Masroof Zindagi Mein Fit Rehna Aasan Hua - Article No. 3312

مردوں کی طرح خواتین کا بھی اپنا ایک مخصوص روٹین ہوتا ہے، جس کے مطابق وہ اپنی تمام سرگرمیاں انجام دیتی ہیں۔عموماً، خواتین کا زیادہ تر وقت روزمرہ کے کاموں مثلاً گھر، دفتر، کاروبار وغیرہ کے کام، بچوں کی دیکھ بھال، کھانے کی تیاری وغیرہ میں گزر جاتا ہے۔ان سب کاموں میں خواتین اپنی صحت کا خیال رکھنا بھول جاتی ہیں۔تاہم اس کا یہ مطلب نہیں کہ خواتین صحت مند نہیں رہنا چاہتیں، بس روزمرہ کی مصروفیات میں وہ صحت کو اپنی ترجیحات میں شامل نہیں رکھ پاتیں۔تاہم، ہم آپ کو بتاتے ہیں کہ صحت مند طرزِ زندگی (Healthy Lifestyle) کے لئے آپ کو اپنی مصروف زندگی میں کوئی بڑا ردو بدل کرنے کی ضرورت نہیں بلکہ چند معمولی باتوں کا خیال رکھ کر آپ صحت مند اور فٹ رہ سکتی ہیں۔
چہل قدمی
ایک اصول بنا لیں کہ کوئی بھی فون کال بیٹھ کر نہیں سنی جائے گی۔

(جاری ہے)

دن بھر میں جب کسی سے بھی فون پر بات کریں، چاہے آفس میں ہوں یا گھر میں، آپ چہل قدمی کرنا شروع کر دیں۔

کچھ اور نہیں تو بیٹھے بیٹھے اپنے پاؤں کو حرکت دیں۔اگر آپ کے پاس دن بھر میں 5 سے 10 فون کالز آتی ہیں تو اندازے کے مطابق تقریباً ایک گھنٹے کا ورک آؤٹ آپ آسانی سے کر لیں گی۔کیلوریز جلانے کا یہ سب سے آسان اور کارآمد طریقہ ہے۔
پانی ضروری ہے
مناسب مقدار میں پانی پینا صحت کے لئے بے حد مفید ہے۔لیکن کبھی کبھی صرف پانی پینا تھوڑا بورنگ ہو جاتا ہے۔ایسے میں زیادہ پانی پینے کے لئے آپ بوتل میں پانی بھر کر اس میں لیموں کا عرق، انناس کے ٹکڑے، پودینہ یا سونف وغیرہ ڈال سکتی ہیں۔اس سے نہ صرف پانی کا ذائقہ بہتر ہو گا بلکہ پانی مزید صحت بخش بھی ہو جائے گا۔
توانائی بحال رکھیں
توانائی بحال رکھنے کے لئے انرجی بارز اپنے ساتھ رکھیں۔زیادہ تر پروٹین بارز مصنوعی شکر یا فلیور اور دیگر اجزاء سے بھرپور ہوتے ہیں۔ایسے پروٹین بارز کا انتخاب کریں، جو صاف، غذائیت سے بھرپور اور قدرتی اجزاء جیسے انڈے کی سفیدی اورمیوہ جات سے تیار کردہ ہوں۔کوشش کریں اس میں کوئی غیر معیاری اجزاء شامل نہ ہوں۔محض گلوٹین فری، سویا فری، ڈیری فری اورشوگر فری کے ٹیگ دیکھ کر استعمال نہ کریں۔
مختصر اور فوری ورزش
جب آپ کے پاس وقت بہت ہی کم ہو تو 10 منٹ کی ورزش ضرور کر لیں۔جس طرح گھڑی کی سوئی تیزی سے چلتی ہے، آپ بھی بالکل اسی کے ساتھ چلنے کی کوشش کریں۔تیس جمپنگ لانجز، بیس کرنچز، پندرہ ایئر اسکواٹس، دس پش اَپس اور پانچ ٹراء سیپ ڈپس کریں، پھر اسے دہرائیں۔
میٹھے کی طلب
اپنے پاس ہمیشہ ڈارک چاکلیٹ رکھیں، جس میں 70 فیصد کوکو اور چینی یا تو نہ ہو یا پھر نہایت ہی مناسب مقدارمیں ہو۔یہ کافی اور میٹھے کی طلب دور کرنے کے لئے بہترین انتخاب ہے، اس سے توانائی میں اضافہ ہوتا ہے۔اگر خالی ڈارک چاکلیٹ سے آپ کی میٹھے کی طلب پوری نہ ہوتی ہو تو اس کے ساتھ آپ ایک ٹکڑا کھجور بھی کھا سکتی ہیں۔اسے آپ چھوٹے سے ڈیزرٹ کے طور پر بھی استعمال کر سکتی ہیں۔
تھکن کو دور بھگائے
پُرسکون رہنے اور تھکن سے ہونے والے سر درد یا جسمانی درد کو بھگانے کے لئے چند اہم ضروری تیل جیسے لیونڈر ا ور جرینیم کا تیل اپنے پاس ضرور رکھیں، ان کی خوشبو آپ کو پُرسکون رکھتی ہے۔جب آپ کشیدگی کا شکار ہوں، جیسے دن بھر مصروف گزرا ہو تو کیمومائل لوشن چہرے پر لگائیں، اس سے جِلد ہائیڈریٹ اور دماغ پُرسکون رہتا ہے۔کسی بھی اور چیز کے مقابلے میں صحت مند رہنے کے لئے مثبت طرزِ زندگی اپنانا زیادہ اہم ہے، جس کے لئے آپ کو تھوڑی سی سمجھداری ہی درکار ہے۔