Baat Ho Jaye Haar Singhar Ki - Article No. 3093

Coral Jasmine یا غمگین پودا دراصل ہار سنگھار ہے اور اسے آرائشی نقطہ نظر سے استعمال کیا جاتا ہے۔اس کی خوشبو بہت خوشگوار ہوتی ہے۔یہ پودا زیادہ گرم اور نیم گرم ملکوں میں پیدا ہوتا ہے۔فرحت بخش اور تیز خوشبو کے شوقین افراد گھر میں اس کا پودا لگاتے ہیں تو دن بھر گھر مہکتا رہتا ہے۔
ہار سنگھار کی پتیاں پانچ سے دس سینٹی میٹر لمبی ہوتی ہیں۔یہ پتیاں ایک دوسرے کے آمنے سامنے ہوتی ہیں اور اس کے پھولوں کی ڈنڈیوں سے زرد اور سنہری رنگ حاصل کیا جاتا ہے۔اس کے سفید پھول رات کو کھلتے ہیں جو صبح تک گرتے رہتے ہیں اور صبح کو دیکھیں تو پورا پودا اجڑا ہوا سا نظر آتا ہے۔اس کا مطلب یہ نہیں کہ آپ اس پودے کو بے جان سمجھ کر اکھاڑ ڈالیں یہ اگلی شام تک پھر ہرا بھرا ہو جائے گا۔

(جاری ہے)

طبی خواص
دوسرے پھولوں کی طرح اس پھول کے بھی عرقیات اور تیل نکالے جاتے ہیں جو مختلف بیماریوں کو دور کرنے کے کام آتے ہیں۔

آیورویدک طریقہ علاج میں اس کی پتیوں سے جوشاندہ تیار کیا جاتا ہے جو عرق النساء (لنگڑی کا درد) پرانے بخار،گٹھیا،آنتوں کے کیڑے،قبض اور Urine کی بے قاعدگی کی تکالیف دور کرتا ہے۔
اس جوشاندے سے بلغم کے اخراج میں بھی مدد ملتی ہے۔پڑوسی ملک بھارت میں ہار سنگھار کے اجزاء کو سرطان جیسے موذی مرض کے خاتمے کے لئے بھی استعمال کیا جاتا ہے۔اس کی پتیوں کا عرق ہاضمے کے نظام کو درست رکھتا ہے۔زہریلے کیڑے مکوڑے کاٹ جائیں تو اس پھول کے عرق کو لگانے سے تکلیف کی شدت کم ہوتی ہے۔
ہار سنگھار کی چھال کے فوائد
اس چھال سے پاؤڈر بنایا جاتا ہے جو جوڑوں کے درد کی شدت کو کم کرنے کے لئے استعمال کیا جاتا ہے۔قدیم یونانی حکیم آج بھی اس پاؤڈر کو گٹھیے کے مریضوں کے علاج کے لئے تجویز کرتے ہیں۔
اس چھال کی مدد سے چمڑے کو رنگا جاتا ہے۔اس پھول کے بیجوں کا پاؤڈر بنا کر اس میں صاف پانی ملا لیا جائے تو لگدی تیار ہوتی ہے اس لگدی کو بالوں کی جڑوں میں لگانے سے خشکی ختم ہو جاتی ہے۔
نباتاتی علاج کی خوبیاں
نباتات کے ماہرین ہار سنگھار کے کیمیائی اجزاء کو بے حد قیمتی کہتے ہیں ان کے خیال میں یہ علاج کم خرچ اور شفا بخش ہوتا ہے۔ہمیں جڑی بوٹیوں سے علاج کرنے کی جانب بھی توجہ دینی چاہئے۔ہو سکتا ہے کہ یہ طریقہ زیادہ شفا بخش ہو کیونکہ جڑی بوٹیوں کے مضر اثرات نہیں ہوتے۔