انشین حسین بلگرامی :
کچھ لوگوں کو پرفیوم استعمال کرنے کا خبط ہوتا ہے خود کو دلفریب خوشبووٴں میں اس قدر بسا لینا چاہتے ہیں کہ ان کے نزدیک سے گزرنے والے ان کی شخصیت کا مسحور کن وخوشگوار تاثر محسوس کر سکیں مگر اکثر ایسا ہوتا ہے کہ خوشبووٴں میں بسے ان افراد کے پاس سے گزرنے پر ناک بند کرنے کو جی چاہتا ہے اور سانس روک کر اپنے چکراتے ہوئے سرکو قابو میں رکھنے کی تگ ودو کی جاتی ہے۔ میرا خیال ہے کہ آپ اپنے آپ یقینا اس کیٹگری سے دور رکھنا چاہتی ہوں گی جس کے قریب سے گزرنے والوں کو سر چکرانے اور جی متلانے لگتا ہے۔ یعنی آپ اپنے سراپے کو ایسی مسحور کو خوشبووٴں میں بسانا چاہتی ہوں گی کہ آپ کے قریب رہنے والے لوگوں کو آپ کے وجود سے اٹھتی تیز مہک سے بچنے کے لئے ماوٴتھ ماسک لگانے کی ضرورت نہ پڑجائے۔ پرفیوم کا استعمال اگر صحیح انداز میں موزوں طریقوں کو پیش نظر رکھتے ہوئے کیا جائے تو یہ خوشبو آپ کی شخصیت کی دلکشی میں بہترین اضافے کا باعث بنتی ہے۔ زیر نظر مضمون میں اسی حوالے سے مفید وکار آمد باتیں بیان کی جا رہی ہیں جنہیں پرفیوم یا کلون (Clonge) استعمال کرتے ہوئے اگر آپ ذہن میں رکھیں تو یہ آپ کے لئے بہت سودمند ثابت ہوں گی۔
خوشبو چاہے کسی بھی حالت (ٹھوس، مائع ، گیس )میں موجود ہو ہمیشہ کوشش کریں اسے کپڑے وجیولری وغیرہ پہننے سے پہلے استعمال کریں کیونکہ بعض اقسام کے پرفیوم، عطریات، ڈیوڈز اور باڈی اسپرے کپڑوں، دھاتی زیورات اور موتی وغیرہ کی سطح پر نہ مٹنے والے نشانات چھوڑ دیا کرتے ہیں۔
پرفیوم لگاتے ہوئے اس بات کا خیال رکھیں کہ اسے اپنے جسم کے نبضی حصوں یا پلس پوائنٹ (Pulse Point) پر لگائیں جیسے کہ کلائی کی پشت پر، تھوڑی کے نچلے حصوں پر، کان کی لووٴں کے پیچھے اور گلے وسینے کے اطرافی حصوں پر وغیرہ وغیرہ۔ پرفیوم لگانے کے بعد دونوں ہاتھوں کی کلائیوں کو آپس میں رگڑنے سے بھی گریز کریں کیونکہ ایسا کرنے سے خوشبو کا آہنگ ٹوٹ جاتا ہے۔ اس بات سے شاید ہی کوئی بے خبر ہوکہ پر فیوم کی مہک اس وقت اور زیادہ نکھرتی ہے۔ جب اسے جسم کے ان حصوں پر لگایا جائے جہاں کا دوران خون تیز ہو، جلد کی سطح باریک ہو اسی لیے اپنے پرفیوم کا اثر پذیری میں اضافہ کرنے کے لئے اسے گردن وکان، گھٹنوں و کہنیوں کے پشت پر بھی لگانا نہ بھولیں۔
آج کل مارکیٹ میں بہترین شمیپو اور کنڈیشنرز بھی آگئے ہیں جن کی خوشبو بلاشبہ بہت بہترین ہوا کرتی ہے لیکن بالوں کو دھونے کے بعد یہ بالوں میں موجود نہیں رہا کرتی اس لئے اگر آپ اپنی زلفوں کو بھی خوشبودار رکھنا چاہتی ہیں تواپنے دُھلے بالوں میں بھی آپ اسپرے کر سکتی ہیں لیکن خیال رہے آپ کے بالوں او ر اسپرے نوزل کے درمیان کم از کم 8 انچ کا فاصلہ ضروری ہونا چاہیے۔ بغیر دھلے ہوئے بالوں پر اسپرے کرنے کی کوشش نہ کریں کیونکہ بالوں میں تبدیلی پیدا کر سکتا ہے۔ اس کے علاوہ اپنے دھلے ہوئے بالوں میں خوشبو پیدا کرنے کے لئے کبھی بھی پرفیوم کا اسپرے اپنے برش یا ہیئر کامب پر مت کیجئے بلک مناسب فاصلہ رکھتے ہوئے بالوں پہ ہی براہ راست اسپرے کریں کیونکہ ہیئر کامب یا برش پر برفیوم لگانے سے خوشبو اس کی سطح پر چپکی رہ سکتی ہے اور دوسری مرتبہ اسے استعمال کرنے پر یہ آپ کے بالوں پر ناخوشگوار تاثر چھوڑ سکتی ہے۔ بہت سے سنگھاری ماہرین اس بات پر متفق ہیں کہ جب افراد کی جلدی رنگت گوری اور اس کی ساخت خشک ہوتی ہے ان کے جسم پرلگایا جانے والا پرفیوم جلد ہی اپنی اثر پذیری کھو بیٹھتا ہے جبکہ روغنی ساختہ جلد کے مالک سانو لے سلونے افراد فیوم کی مہک کو زیادہ دیر تک اپنے سراپے میں قید کیے رہتے ہیں۔ اس لئے گوری رنگت کے حامل افراد اپنے سراپے کو نہ صرف صبح گھر سے نکلتے ہوئے پرفیوم کے محض ایک یا دو اسپرے کے ذریعے مہکانے کی کوشش کریں بلکہ دوپہر کے وقت پرفیوم کے 1-2 اسپرے سے اسے تازہ دم کرلیں۔ بوٹی ایکسپرٹس ایسے لوگوں کو لیئرز (Layers) یا تہوں کی صورت میں بھی خوشبو استعمال کرنے کا مشورہ دیتے ہیں۔ یہ کچھ اس طرح ہے کہ آپ نے کسی ایک برانڈ کا پرفیوم منتخب کیا جیسے مثال کے طور پر ٹی روز(T-Rose) یا ایسٹی لاوٴڈر (Estee louder) یا پروفیسی وغیرہ تو آپ رول آن ڈیو، باڈی اسپرے وغیرہ بھی اسی خوشبو کا استعمال کریں۔ آج کل مارکیٹ میں پرفیوم لیئرنگ پروڈکٹس بھی دستیاب ہیں جن میں شاور جیل کے ساتھ، رول آن یا ڈیو اسپرے، پرفیوم یہاں تک کہ موئسچرائزنگ لوشن بھی جو ایک ہی خوشبو کے حامل ہوتے ہیں موجود ہوتے ہیں۔ان پروڈکٹس کو آپ اپنی سنگھاری تیاری میں درجہ بدرجہ استعمال کرنے کے بعد اپنے سراپے کو آپ اپنی پسندیدہ مسحور کون خوشبووٴں میں کئی گھنٹوں تک آرستہ رکھنے میں کامیاب ہو سکیں گی۔ لیکن پرفیوم لیئرنگ کرتے ہوئے خوشبو کی ساخت کا ملتا جلتا ہونا ضروری ہے ،یہ نہیں کہ فلوری یا پھولوں ایسی بھینی خوشبو والا ڈیو اسپرے لگانے کے بعد آپ بلیو واٹر یا گیم آف پیرس ایسے تیز خوشبو دار سینٹ یا پرفیوم کا استعمال کریں گی تو مسحور کن پرفیوم لیئرنگ کے بجائے آپ کنفیوز لیئرنگ کے مسئلے سے دو چار ہو سکتی ہیں۔
وقت کے ساتھ اپنے پرفیوم کے برانڈ کو بھی تبدیل کرنے کی کوشش کرتی رہا کریں یہ بات طبی تحقیق سے بھی ثابت ہوتی ہے کہ مختلف خوشبو آپ کی طبیعت ومزاج پہ مختلف انداز سے مثبت اثرات مرتب کرتی ہے اس لئے اپنے موڈ کو خوشگوار تبدیلیوں سے لطف انداز ہونے کے لئے ہر تین سے چار ماہ بعد اپنا پرفیوم برانڈ تبدیل کرنے کی کوشش کریں۔ اگر آپ اپنے پسندیدہ پرفیوم کو ”اڑنے “ سے یا بنا استعمال کیے ہی ضائع ہونے سے محفوظ رکھنا چاہتی ہیں تو اپنے پرفیوم کی بوتل کو ایئر ٹائٹ پلاسٹک جار میں بند کرکے فریج میں رکھیں اس طرح کرنے سے وہ تکسیدی عمل یا آکسیڈیشن کا عمل رک جائے گا جس کی وجہ سے پرفیوم کی بوتل میں موجود خوشبو کے بخارات فضا میں موجود آکسیجن کے مالیکولز سے تعامل کر کے چپکے چپکے نا محسوس انداز میں پرفیوم کی بوتل کو خالی کرنے کا سبب بن جایا کرتے ہیں۔
کبھی بھی پرفیوم کی خریداری اس طرح نہ کریں کہ آپ کی فلاں دوست نے جو پرفیوم لگایا تھا اس کی خوشبو اچھی تھی تو اسی برانڈ کا پرفیوم آپ نے بھی خرید لیا۔ یہ طریقہ کار درست نہیں ہے خوشبو کی خریداری ہمیشہ اپنی شخصیت کے لحاظ سے کریں آپ کے جسم کے کیمیائی ڈھانچہ یا اسٹریکچر کا پرفیوم کے کیمیکل اسٹریکچر سے تعامل کے نتیجے میں خوشبو کا آہنگ یکسر تبدیک ہو سکتا ہے۔ اس لئے جب بھی خوشبو کی یعنی پرفیوم ،کلون یا باڈی ڈیو/ اسپرے کی خریداری کر رہی ہوں تو اسے اپنی کلائی کی پشت پر لگا کر چند لمحوں کے توقف کے بعد سونگھیئے اگر آپ کے دل کو بھائے تو اسے خریدیئے ورنہ کسی اور پرفیوم کو آزمائیے۔ کوشش کریں ہر مرتبہ پرفیوم کی خوشبو آزمانے کے لئے اسی حصے پر اسپرے نہ کریں رونہ دوتین خوشبووٴں کے تعامل سے آپ اپنے درست انتخاب کی جانب بڑھنے میں کنفیوژن کا شکار ہو جائیں گے۔