Gher Ki Deewaroon Ki Ronaq Barhayeen - Article No. 2532

راحیلہ مغل
جب بھی گھر کی خوبصورتی کو بڑھانے کی بات آتی ہے تو زیادہ سے زیادہ یہی ذہن میں آتا ہے کہ گھر میں رنگ و روغن کروا لیا جائے ۔اکثر یہی سمجھا جاتا ہے کہ رنگ کروانے سے دیواروں میں ایک نئی جان سی آجاتی ہے۔لیکن یہ سوچ غلط ہے،اکثر رنگ کروانے کے باوجود دیواریں پھیکی اور بے جان سی ہی لگتی ہیں،یہی وجہ ہے کہ گھر کی خوبصورتی کو بڑھانے اور ان پھیکی دیواروں میں جان ڈالنے کیلئے گھر بیٹھے ہی کچھ طریقے اختیار کئے جا سکتے ہیں،وہ طریقے کیا ہیں،آئیے جانیے۔
کیلنڈر
دیواریں اگر سادہ ہیں تو اچھے سے کیلنڈرز ان میں ایک نئی جان سی ڈال سکتے ہیں۔ایسے کیلنڈر کا انتخاب کریں،جن میں مختلف تصاویر بنی ہوئی ہوں،یا مختلف پینٹنگز ان پر بنائی گئی ہوں۔

(جاری ہے)

ایسے پرانے کیلنڈرز جو بہت اچھے منظر یا پینٹنگز پر مشتمل ہوں،ان کیلنڈرز کو بھی فریم میں لگا کر گھر کی مختلف دیواروں پر لگا لئے جائیں تو ان میں ایک جان سی محسوس ہونے لگتی ہیں۔

رسی،دھاگے سے تیار کردہ وال آرٹ
جوٹ،مکرامے یا دھاگے سے مختلف دیواروں پر لٹکانے والے وال آرٹ تیار کئے جا سکتے ہیں،انٹرنیٹ پر مختلف ڈوریوں کی مدد سے گھر پر ہی گھڑی تیار کرنا،مکرامے تیار کرنے کی ویڈیوز موجود ہیں۔ان کا سائز بڑا رکھا جائے اور گھر پر اپنے ہاتھوں سے تیار کردہ ان شاہکاروں کو ڈرائنگ روم یا بیڈ روم میں لگائیں اور ان کمروں کی دیواروں میں جان ڈالیں۔
رسائل و اخبارات
ہمارے گھروں میں مختلف جرائد،رسالے اور اخبارات روزانہ آتے ہیں،جو پڑھنے کے بعد بے کار پڑے رہ جاتے ہیں اور بعد میں انہیں ردی کے سپرد کر دیا جاتا ہے۔جبکہ یہی رسالے اور اخبارات آپ کے بہت کام آسکتے ہیں۔رسالوں اور اخبارات میں خوبصورت سے مناظر پر مشتمل تصاویر ہوتی ہیں،اسی طرح رسائل بھی مختلف پینٹنگز،مناظر یا تصاویر پر مشتمل ہوتے ہیں،اپنی پسندیدہ ڈشز یا شخصیت کی تصاویر، پینٹنگز اور مناظر کو رسائل و اخبارات سے کاٹ کر انہیں کسی گتے پر چپکا لیں،پھر اسے فریم کرکے گھر کی دیواروں پر لگا لیں۔
پرانی تصاویر
گھر کی دیواروں میں نئی جان ڈالنے کیلئے پرانی تصاویر اہم کردار ادا کر سکتی ہیں۔دنیا سے گزر جانے والے رشتہ دار کی تصاویر،یا گھر والوں اور دوستوں کی تصاویر ہوں،یہ اگر دیواروں پر لگا لی جائیں تو گھر کی بے جان دیواریں ان قیمتی رشتہ داروں کی تصاویر سے سجتی دکھائی دیں گی۔گھر کی کسی دیوار پر ایک بڑا سا درخت پینٹ کریں اور اس کی ہر شاخ پر فیملی ممبر کی تصویر لگا دیں،اس طرح پرانی تصاویر سے ایک”فیملی ٹری“ تیار ہو جائے گا۔چاہیں تو ان پرانی تصاویر کو ایک بڑے فریم میں لگا لیں،یا ایک فریم میں 4 سے 5 چھوٹی تصاویر کو پن کی مدد سے لگا لیں۔یوں ان پرانی یادگار تصاویر کی مدد سے گھر کی بے جان دیواروں میں جان سی پڑتی ہوئی دکھائی دے گی۔