H2O Moisturizer Ho To Acha Hai - Article No. 3007

زائد پسینہ آنے کی صورت میں جہاں پورے جسم کی قدرتی نمی ضائع ہوتی ہے وہیں جسم کے زہریلے مادے بھی نکل جاتے ہیں مگر خیال رہے کہ انسانی جسم کا 60 فیصدی حصہ پانی پر مشتمل ہوتا ہے جو کیمیائی عمل کی رفتار جاری رکھنے اور پورے اعضائے بدن کے قدرتی افعال کے لئے مزید پانی پینے کی طلب میں اضافہ کرتا ہے۔جسم اور دماغ پیاس کے احساس کو دو چند اسی لئے کرتے ہیں اور صحت مند و چمکدار جلد کے لئے ہمارا پانی پینا بے حد ضروری ہوتا ہے۔

(جاری ہے)

جہاں تک موئسچرائزر لگانے کا تعلق ہے تو گرمیوں یا برسات کے موسم میں پانی کی آمیزش سے تیار ہونے والے موئسچرائزرز استعمال کرنا مفید ہو سکتے ہیں۔آپ اور ہم پانی تو پیتے ہیں مگر ممکن ہے کہ مطلوبہ مقدار میں نہ پیتے ہوں اور شاید وہ اندرونی اعضاء کی کارکردگی بحال رکھنے کے لئے ناکافی ہو اور بیرونی جلد اسی طرح بے رونق،خشک اور پژمردہ سی رہ جائے لہٰذا جلد کی نمی اور رطوبت بحال کرنے کے لئے موئسچرائزر لگایا کیجئے مگر انتخاب کیجئے Water-Based پروڈکٹ کا۔

آپ کی بہت قیمتی اور نہایت اعلیٰ کاسمیٹکس کیا اس بے رونق جلد پر استعمال کرکے سو فیصدی نتائج حاصل کر سکتی ہیں ہر گز بھی نہیں۔پانی ملے موئسچرائزر جلد کی اس کمی کو دور کرکے اسے صحت مند،روشن اور جاذب نظر بنا دے گا،دراصل یہی موئسچرائزر آپ کے چہرے کو بھرپور حد تک شفاف کینوس بنا دیتا ہے،بے شک اب آپ اپنی بہترین کاسمیٹکس استعمال کیجئے۔
پانی کی آمیزش والے موئسچرائزر مفید کیوں؟
پہلا مسئلہ جسم میں پانی کی کمی واقع ہو جانا ہے اور دوسرا مسئلہ جلد کو قدرتی روغنیات سے قریب تر رہ کر نم کر دینا ہے۔جسم میں میٹا بولک پروسس کے دوران پانی خارج ہوتا ہے یعنی جب ہم ٹھوس غذا مثلاً پھل،چپاتی،دال چاول کھاتے اور پانی پیتے ہیں تو اس طرح بھی کھانے کے ساتھ کچھ پانی جسم کے اندر پہنچ جاتا ہے۔پانی کا توازن برقرار رکھنے میں گردوں کا کردار بھی کم اہم نہیں۔جہاں قدرتی طور پر پانی کا اخراج ہوتا ہے اسی طرح پھیپھڑوں کے ذریعہ (سانس) جلد کے ذریعے (پسینہ) اور آنتوں کے ذریعے (فضلہ) خارج ہوتا ہے۔
جب ہم پانی کی کمی پر قابو پا لیتے ہیں تو اپنے خدوخال اور مجموعی صحت پر خوشگوار اثر خود محسوس کر سکتے ہیں۔اگر آپ پانی پر مشتمل موئسچرائزر استعمال کرتی ہیں تو محسوس کریں گی کہ یہ جلد پر نظر نہیں آتا بلکہ جذب ہو کر جلد کو تقویت دیتا ہے۔اس میں شامل اجزاء بہت سرعت رفتاری سے اپنا اثر دکھاتے ہیں۔ہماری جلد روغن پیدا کرتی ہے پانی نہیں اس لئے ہمیں پانی پی کر یا جلد پر پانی والی اشیاء لگا کر اس کی عمر کو حتی الامکان حد تک محفوظ کرنے میں مدد دیتی ہے۔کوئی بھی موئسچرائزر خریدتے وقت اس پر پانی کے فارمولے H20 کی موجودگی کا یقین کر لیا کریں۔پھر دیکھیں گرمیوں میں یا سردیوں میں بھی آپ کی جلد کیسے پُررونق،جواں تر اور دلکش نظر نہیں آتی۔