Jild Ko Khobsorat Banane K Liye Desi Azmoda Nuskhe - Skin Care

حمائل محمود:
جلد کو خوبصورت، نکھری اور چمکدار بنانے کے لئے دیسی آزمودہ نسخے آج بھی اتنے ہی کار آمد ہیں، جتنے آج سے صدیوں پہلے تھے۔اگر آپ خود پر تھوڑی سی توجہ دیں تو آپ کا رنگ بھی صاف ہو سکتا ہے۔
چہرے کے نکھارنے کے لئے:۔
جو اور گہیوں کا آٹا دودھ میں ملا کر لئی بنا لیجیے اور اسے چہرے پر ابٹن کی طرح ملئے، ملنے کے ایک گھنٹے کے بعد منہ دھو لیں ،یہ نسخہ رنگ کو نکھارتا ہے۔

گردن کے لئے:۔
دودھ میں تھوڑا سا لیموں کا رس ملا کر اسفنج سے لگائیں ،خشک ہونے پر ٹھنڈے پانی سے دھو ڈالیں ،چند روز کے استعمال سے تبدیلی محسوس ہونے لگے گی۔
چہرے کی نرمی کے لئے:۔
گلیسرین میں تھوڑا سالیموں کا رس ملا کر رکھ دیں ہر روز صبح منہ دھونے کے بعد لگائیے بلکہ ہاتھوں سے پورے چہرے کی مالش کریں اس سے آپکی جلد نرم اور رنگ صاف ہوگا۔

(جاری ہے)

چہرے کی چمک کے لئے:۔
کھانے کے دو چمچ دودھ چینی ایک چمچہ پسا ہوا نمک ملا کر رات سوتے وقت چہرے پر خوب اچھی طرح مالش کریں صبح اْٹھ کر ٹھنڈے پانی سے چہرے کو اچھی طرح دھو ڈالئے ،اس سے آپ کے چہرے پر چمک اور نکھار پیدا ہوگا۔
غسل کے لئے:۔
نہانے کے پانی میں لیموں کا رس اور نمک ملا کر غسل کرنے سے جلد کا رنگ نکھرنا شروع ہو جاتا ہے۔

دانوں کے نشانات کے لئے:۔
روغن زیتون اور روغن کریم ملا کر چہرے پر ان جگہوں پر لگائیں جہاں دانوں کے نشانات رہ گئے ہوں۔اس مساج کا استعمال اس وقت تک کریں جب تک نشانات مکمل طور پر ختم نہ ہو جائیں۔
چھائیوں کو دور کرنے کے لئے:۔
آدھا چمچ لیموں کا رس،آدھا چمچ شہد ملا کر ماسک بنا لیں اور ہفتے میں دو تین بار استعمال کریں۔

اگر ایڑیاں پھٹنا شروع ہو جائیں:۔
ایک لیموں کا چھلکا پیس لیں اس میں ایک چائے کا چمچ گلیسرین، ایک چمچہ گلاب کا عرق ملا کر ایک کریم تیار کر لیں رات کو سونے سے پہلے پھٹی ہوئی ایڑیوں پر لگائیں صبح پیر دھو لیں، چند دنوں میں پھٹی ایڑیاں ٹھیک ہو جائیں گی۔
روکھے بالوں میں چمک پیدا کرنے کے لئے:۔
سردھونے کے بعد ایک مگ پانی میں ایک لیموں کا رس ملا کر سرد دھو لیں صرف اسی پانی سے بالوں میں چمک آجاتی ہے۔

ناخنوں کی چمک کے لیے:۔
آپ لیموں کے چھلکے سے جس میں نمی موجود ہو، ناخن کا مساج کریں، ناخن صاف اور چمکدار ہو جائیں گے۔
آنکھوں کے حلقے کے لئے:۔
آنکھوں کے حلقے پر کچے آلو رگڑیں یا آلو کا رس لگائیں۔اس سے آنکھوں کے حلقے دور ہو جائیں گے۔روزانہ صبح ایک ماہ تک ایک عدد سیب کھائیں اور پانچ منٹ بعد ایک گلاس دودھ پی لیں۔