Sola Singhar Hue Itne Aasan - Article No. 3295

بسمہ قاسم
ایک شخص سخت گرمی کے موسم میں سڑک کے کنارے کوٹ پینٹ پہنے کھڑا تھا۔قریب سے گزرنے والے حضرت نے اسے دیکھا اور پوچھا! ”خیریت؟ اتنی گرمی میں کوٹ پینٹ۔“ دراصل ہمیں ایک تقریب میں شرکت کرنی ہے اور میرا خیال ہے، جتنی دیر میں میری بیگم تیار ہو کر آئیں گی، سردی شروع ہو چکی ہو گی۔اس نے وضاحت کی۔
خواتین پر یہ الزام ہے کہ وہ تیار ہونے میں کافی وقت صرف کرتی ہیں، کوئی نیا نہیں اور غلط بھی نہیں۔حوا کی بیٹی جب تک مکمل سنگھار نہ کر لے، مطمئن نہیں ہوتی جس میں وقت تو لگتا ہے اس سلسلے میں اب پریشان ہونے کی ضرورت نہیں، آج ہم آپ کو کچھ ایسے طریقے بتاتے ہیں۔جن پر ہم عمل کر کے آپ بہت کم وقت میں آپ عید یا کسی تقریب کے لئے تیار ہو کر سب کو حیران کر سکتی ہیں۔

(جاری ہے)

کسی تہوار یا تقریب سے ایک دن قبل ہی منصوبہ بندی کر لیجئے کہ تقریب کے لئے کون سا لباس موزوں رہے گا۔

اس کے ساتھ جیولری کا بھی انتخاب کر لیں جس دن تقریب میں شرکت کرنی ہو تو کوشش کیجئے کہ گھر کے کام صبح ہی نمٹا لیں۔رات میں شرکت کرنی ہو تو دوپہر کا کھانا سادہ سا تیار کر لیں۔
اب تمام کاموں سے فارغ ہو کر اپنا لباس، جیولری اور جوتے نکال کر دیکھیے۔اگر لباس صاف ہے تو اسے استری کر کے لٹکا دیجئے، ورنہ پہلے دھو لیں اسی طرح جوتے بھی صاف کریں اور جیولری ترتیب سے رکھ دیجئے۔میک اپ کا سامان بھی نکال لیجئے۔پوری تسلی کر کے دوپہر کو تھوڑی دیر کے لئے سو جائیے، کیونکہ تقریب سے واپسی پر رات ہو سکتی ہے۔ڈیڑھ سے دو گھنٹے کی نیند کافی رہے گی۔
شام کو غسل کر کے تازہ دم ہو جائیں۔گھر کے دیگر افراد کی ذمہ داری بھی اگر آپ ہی پر ہو تو یہ وقت درج ہے، اس سے ایک گھنٹہ پہلے اپنی تیاری شروع کر دیجئے، چونکہ سب چیزیں پہلے ہی تیار ہیں، اب آپ منٹوں میں تیار ہو کر سب کو حیران کر سکتی ہیں۔اگر ہم اسی طرح اپنے کام منصوبہ بندی سے کریں تو وقت کی کمی کا رونا کبھی نہ روئیں۔