جانی ڈیپ ،جیک اسپیرو کے روپ میں واپسی کے لئے تیار

لاس اینجلس (اُردو پوائنٹ اخبارتازہ ترین - آن لائن۔ 08 فروری2017ء)جانی ڈیپ ایک بار پھر جیک اسپیرو کے روپ میں واپسی کے لئے تیار ہیں۔ہالی وڈ کی بلاک بسٹر سیریزپائیریٹس آف دی کیریبیئن 5کی نئی جھلکیاں جاری کردی گئیں۔مشہور و معروف ہالی وڈ کامیڈی ایڈونچر فلم سیریز پائیریٹس آف دی کیریبیئن سلسلے کی اگلی فلم "پائیریٹس آف دی کیریبیئن - ڈیڈ مین ٹیل نو ٹیلز"کا ٹریلر منظرِ عام پر آگیاہے جس میں ایک بار پھر سے جانی ڈیپ لیجنڈنری کردار کیپٹن جیک اسپیروکے روپ میں جلوہ گر ہورہے ہیں۔

سیریز کی پانچویں کڑی کو جواشم روننگ اور اسپین اسینڈ برگ مشترکہ طور پر ڈائریکٹ کر رہے ہیں جس کی کہانی گزشتہ فلموں کی طرح بہادر اور نِڈر جیک اسپیرو کے گِرد گھوم رہی ہے جو اپنے ساتھیوں کے ہمراہ نامعلوم خزانے کی تلاش میں سمندری سفر پر نکلتا ہے اورراہ میں حائل دشمنوں کا ڈٹ کا مقابلہ کرتا ہے۔

(جاری ہے)

اس پانچویں اور آخری داستان کو جیری بریکہیمرپروڈیوز کر رہے ہیں جبکہ فلم کی کاسٹ میں جانی ڈیپ کے علاوہ جیوفری رش، اورلینڈو بلوم ، برینڈن ٹھیویز،کیون میک نیلی اورجیویئر بارڈمین اپنے گزشتہ کرداروں میں ایک بار پھر دِکھائی دیں گے جن کے علاوہ کچھ نئے کردار بھی فلم کا حصہ بنائے گئے ہیں۔

250ملین ڈالر لاگت سے بننے والی والٹ ڈزنی پکچرز کی ایکشن اورایڈونچر سے بھرپور نئی فینٹسی کامیڈی فلم "پائیریٹس آف دی کیریبیئن - ڈیڈ مین ٹیل نو ٹیلز" موشن پکچرز اور والٹ ڈزنی اسٹوڈیوز کے تحت 26مئی 2017کو سنیما گھروں میں نمائش کیلئے پیش کی جائی گی۔