سعودی ولی عہد کا دورہ پاکستان دونوں ممالک کے تعلقات میں گیم چینجر ثابت ہو گا،محسن نقوی

اسلام آباد(اردو پوائنٹ اخبارتازہ ترین۔18 مئی 2024 )وفاقی وزیر داخلہ محسن نقوی کا کہنا ہے کہ سعودی ولی عہد کا دورہ پاکستان دونوں ممالک کے تعلقات میں گیم چینجر ثابت ہو گا،پاکستانی قوم سعودی عرب کے ولی عہد شہزادہ محمد بن سلمان دیدہ فرش راہ ہے،سعودی عرب نے ہر آزمائش میں پاکستان کا ساتھ نبھایا۔وفاقی وزیر داخلہ محسن نقوی نے سعودی عرب کے سفارتخانے کا دورہ کیا جہاں سعودی عرب کے سفیر نواف بن سعید احمد المالکی نے وفاقی وزیر داخلہ محسن نقوی کا خیر مقدم کیا۔

وفاقی وزیرداخلہ کی سعودی عرب کے سفیر نواف بن سعید احمد المالکی سے ملاقات ہوئی جس میں باہمی دلچسپی کے امور، پاک سعودیہ تعلقات اور مختلف شعبوں میں تعاون بڑھانے پر تبادلہ خیال کیا گیا۔سعودی عرب کے سفیر نے اسلام آباد پولیس کی بہتری کیلئے بھرپور تعاون کی یقین دہانی کروائی جبکہ وفاقی وزیر داخلہ محسن نقوی نے ایف سی کے جوانوں کیلئے رہائش کا انتظام کرنے پر سعودی عرب کے سفیر کا شکریہ ادا کیا۔

(جاری ہے)

دونوں رہنماوں کے درمیان ملاقات میں سعودی عرب کے ولی عہد شہزادہ محمد بن سلمان کے دورہ پاکستان کے حوالے سے بھی گفتگو ہوئی ۔سعودی سفیر نواف بن سعید احمد المالکی نے اس موقع پر گفتگو کرتے ہوئے کہا کہ اسلام آباد پولیس کو جدید خطوط پر استوار کرنے کیلئے ہر ممکن تعاون کریں گے۔ سعودی عرب پاکستان کے ساتھ اپنے تعلقات کو بہت اہمیت دیتا ہے۔

اس موقع پر گفتگو کرتے ہوئے محسن نقوی نے کہا کہ سعودی عرب اور پاکستان کی تاریخی برادرانہ دوستی سود مند معاشی تعلقات میں بدل رہی ہے، سعودی عرب کے سرمایہ کاروں کا حالیہ دورہ پاکستان انتہائی کامیاب رہا، پاکستان کے عوام سعودی عرب کے ولی عہد کے دورے کے منتظر ہیں۔ موجودہ دور میں پاکستان اور سعودی عرب کے تعلقات نئی بلندیوں پر پہنچ رہے ہیں۔