پی ٹی آئی نے پرویزالہی کی قربانیوں کا صلہ حماد اظہر کی لانچنگ سے دینے کی کوشش کی

اسلام آباد ( اردوپوائنٹ اخبارتازہ ترین۔ 23 مئی 2024ء) سابق وفاقی وزیر سینیٹر فیصل واوڈا نے کہا ہے کہ پی ٹی آئی نے پرویزالہی کی قربانیوں کا صلہ حماد اظہر کی لانچنگ سے دینے کی کوشش کی۔ انہوں نے ایکس پر اپنے بیان میں کہا کہ پی ٹی آئی نے پرویز الہی کی قربانیوں کا صلہ حماد اظہر کی لانچنگ سے دینے کی کوشش کی ہے۔ بہادری کے نام پر رچائے جانے والا یہ سارا ڈرامہ دراصل پنجاب میں پارٹی پر قبضے کے خوف سے ہو رہا ہے۔

جو مفرور خود باہر آ کر بھی چھپ رہا ہے وہ بتا رہا ہے دوسرا مفرور مراد سعید جلد منظر عام پر آئے گا۔ میرے خیال میں مراد سعید جلد منظر عام پر نہیں آئے گا۔دوسری جانب گزشتہ روز پاکستان تحریک انصاف کے رہنما حماد اظہر بھی منظر عام پر آگئے، پی ٹی آئی کے جی 8 میں واقع مرکزی سیکرٹریٹ پہنچ گئے، حماد اظہر کے منظر عام پر آنے کے بعد وفاقی پولیس بھی حرکت میں آگئی۔

(جاری ہے)

پولیس اہلکار پی ٹی آئی سیکرٹریٹ پہنچے لیکن حماد اظہر پولیس اہلکاروں کے پہنچنے سے قبل ہی پشاور روانہ ہوچکے تھے، وفاقی پولیس اہلکاروں کی جانب سے سیکرٹریٹ کے سٹاف سے پوچھ گچھ کی گئی۔ نیوزایجنسی کے مطابق سیکرٹریٹ آمد پر میڈیا سے گفتگو کرتے ہوئے حماد اظہر نے کہا کہ بانی پی ٹی آئی کا پیغام سر آنکھوں پر کل پیغام ملا آپ کے منظر عام پر آنے کا وقت آگیا ہے تو میں میدان میں آگیا ہوں ۔

ان کا کہنا تھا کہ اس سے پہلے مجھے کہا گیا تھا کہ تم پر تشدد ہو گا اس لیے روپوش ہو جاؤ لیکن اب روپوشی ختم کردی ہے ہم کسی صورت نہیں جھکیں گے اور رؤف حسن پر حملے کی مذمت کرتے ہیں۔ انہوں نے کہا کہ عمران خان نے کہا ہے کہ پارٹی کو آپ کی ضرورت ہے قیادت کرنے کا وقت آگیا ہے ۔ حماد اظہرنے مزید کہا کہ اب میں پشاور جاؤں گا، پشاورسے ضمانت کروا کر لاہورکی متعلقہ عدالتوں میں پیش ہوں گا، مراد سعید سمیت دیگر رہنما بھی بہت جلد منظرعام پرآئیں گے۔

یاد رہے حماد اظہر گزشتہ سال 9 مئی کے بعد سے روپوش تھے اور اب تقریباً ایک سال بعد منظرعام پر آئے ہیں۔ سانحہ 9 مئی کے بعد حماد اظہر کے خلاف بھی دہشت گردی اور مختلف الزاما کے تحت مقدمات درج کیے گئے ہیں اور وہ کافی عرصے سے روپوش تھے۔