ماورائے آئین و قانون ہتھکنڈوں کا استعمال قانون کی حکمرانی کا جنازہ نکال رہا ہے، پی ٹی آئی

اسلام آباد ( اُردو پوائنٹ اخبارتازہ ترین۔ 27 مئی 2024ء ) پاکستان تحریک انصاف کا کہنا ہے کہ ریاستی مشینری کی جانب سے شہریوں کے خلاف ماورائے آئین و قانون ہتھکنڈوں کے استعمال کی روِش ملک سے قانون کی حکمرانی کا جنازہ نکال رہی ہے۔ تفصیلات کے ماطبق سرگودھا میں اقلیّتی آبادی کے خلاف پرتشدد کارروائیوں کی روک تھام کے معاملے پر اپنے ایک بیان میں ترجمان پی ٹی آئی نے کہا کہ قانون ہاتھ میں لے کر مسیح برادری کے افراد کے خلاف پرتشدد اقدام نہایت قابلِ مذمت ہے، پنجاب میں انتخاب ہاری ہوئی ایک چھچھوری خاتون شہریوں کے جان مال کا تحفظ یقینی بنانے کی بجائے اپنے ٹک ٹاک کے شوق پورے کرنے میں لگی ہوئی ہے۔

ترجمان تحریک انصاف کا کہنا ہے کہ سستی اور گھٹیا پبلسٹی سٹنٹس کرنے یا صوبے میں پولیس اور مشینری کو سیاسی انتقام کیلئے استعمال کرنے کے علاوہ اس مینڈیٹ چور وزیراعلیٰ کے پاس کرنے کو کوئی دوسرا کام نہیں، دستور و قانون ریاست کو بلاتفریق شہریوں کے جان مال کی سلامتی یقینی بنانے کا پابند بناتے ہیں، مینڈیٹ چور سرکار پرامن سیاسی کارلنوں کے پیچھے بھاگنے کی بجائے حقیقی شرپسندوں کا تعاقب کرے اور شہریوں کو ان کی شرانگیزیوں سے محفوظ بنائے، اس واقعے کی تمام پہلوؤں سے تحقیقات کی جائیں اور ذمہ داروں کو کٹہرے میں کھڑا کیا جائے۔

(جاری ہے)

اس کے علاوہ پاکستان تحریک انصاف نے سپریم کورٹ میں فوجی عدالتوں کیخلاف انٹرا کورٹ اپیلیوں کی سماعت کی کارروائی کو جلد سے جلد آگے بڑھانے اور سویلینز کا فوجی عدالتوں میں ٹرائل کالعدم قرار دینے کا مطالبہ کیا ہے، اس حوالے سے کہا گیا ہے کہ سپریم کورٹ کے سویلینز کے فوجی عدالتوں میں ٹرائل کو غیرآئینی قرار دیے جانے کے باوجود گزشتہ ایک سال سے ملٹری جیلوں میں ناحق قید بےگناہ نوجوان ریاستی ظلم اور فسطائیت کی زد میں ہیں، 24 اپریل کو کیس کی گزشتہ سماعت پر لارجر بینچ کی تشکیل کی درخواست کو ایک ماہ سے زائد کا عرصہ گزر چکا مگر مقدمے کو سماعت کیلئے مقرر نہیں کیا گیا۔

ترجمان پی ٹی آئی نے کہا کہ ملٹری حراست میں غیر آئینی طور پر قید افراد کے ساتھ روا رکھے جانے والے انسانیت سوز سلوک کے باعث ان کے اہلخانہ شدید تکلیف اور کرب میں مبتلا ہیں، شدید گرمی کے موسم میں ان بے گناہ افراد کو ملٹری جیلوں میں ناگفتہ بہ حالات میں ناحق قید رکھ کر بنیادی انسانی حقوق پامال کیے جا رہے ہیں، آئین میں وزارتِ دفاع کے ایک ملازم کو منصف کا درجہ دے کر اس کے ہاتھوں سویلین آبادی کے فوجی عدالتوں میں ٹرائل کی ہر گز کوئی گنجائش نہیں،دنیا کے کسی مہذب جمہوری معاشرے میں فوجی عدالتوں یا سول آبادی کے ان میں ٹرائلز کا کوئی نشان تک نہیں ملتا۔

ترجمان تحریک انصاف کا کہنا ہے کہ شہریوں کو جھوٹے، جعلی اور من گھڑت مقدمات میں نامزد کر کے ان کے فوجی ٹرائلز کو بلاجواز التوا کا شکار رکھنا انسانی حقوق پر منظم حملے کے شرمناک تسلسل کی کڑی ہے، سپریم کورٹ ملٹری عدالتوں کے خلاف انٹرا کورٹ اپیلوں کے معاملے کو فوری لارجر بنچ تشکیل دے کر سماعت کیلئے مقرر کرے اور اس مقدمے کی کارروائی کو بھی 'بلے' کے کیس کی طرز پر آگے بڑھائے، عدالتِ عظمیٰ دستور اور بنیادی حقوق دونوں کا تحفّظ یقینی بنائے اور ملٹری حراست میں موجود افراد کی رہائی کے احکامات جاری کرے۔