معروف اداکار، دانشور اور پروفیسر شعیب ہاشمی کو مداحوں سے بچھڑے ایک برس بیت گیا

لاہور(اُردو پوائنٹ اخبارتازہ ترین - آن لائن۔ 15 مئی2024ء) معروف اداکار، دانشور، ڈرامہ نگار اور پروفیسر شعیب ہاشمی کو بچھڑے ایک برس بیت گیا۔1935 میں پیدا ہونے والے شعیب ہاشمی نامور شاعر فیض احمد فیض کے داماد تھے، انہوں نے گورنمنٹ کالج لاہور سے اکنامکس میں ایم اے کیا اور پھر لندن سکول آف اکنامکس سے ایم ایس سی کی ڈگری حاصل کی، رائل اکیڈمی آف ڈرامیٹک آرٹس، لندن سے تھیٹر کی تعلیم بھی حاصل کی۔

(جاری ہے)

شعیب ہاشمی گورنمنٹ کالج لاہور میں برس ہا برس درس و تدریس سے وابستہ رہے، 1970 کی دہائی میں شعیب ہاشمی نے پاکستان ٹیلی ویژن کیلئے کئی کامیڈی سیریل لکھے جس میں بچوں کی تعلیم کیلئے خاص پروگرام اکڑ بکڑ، سچ گپ، ٹال مٹول اور با ٹرین بہت مقبول ہوئے۔فنون لطیفہ اور ادبی خدمات کے اعتراف میں 1995 میں حکومت پاکستان نے شعیب ہاشمی کو پرائڈ آف پرفارمنس اور تمغہ امتیاز سے نوازا، شعیب ہاشمی 15 مئی 2023 کو 84 سال کی عمر میں اپنے خالق حقیقی سے جا ملے۔