کینسر میں مبتلا 28 سالہ ٹک ٹاک اسٹار نتاشا ایلن چل بسیں

نیو یارک (اُردو پوائنٹ اخبارتازہ ترین - این این آئی۔ 28 اگست2025ء)کینسر کے عارضہ میں مبتلا ٹک ٹاک اسٹار نتاشا ایلن 28برس کی عمر میں چل بسیں، وہ کئی برسوں سے سٹیج 4کینسر کے خلاف لڑ رہی تھیں اور اپنی ہمت، مثبت سوچ اور حوصلہ افزائی سے لاکھوں دلوں کو چھو چکی تھیں۔نتاشا ایلن نے اپنی بیماری کا اعلان 2020 میں کیا تھا جب ڈاکٹروں نے ان کے گھٹنے میں مہلک رسولی دریافت کی تھی، بعد ازاں ایک سال کے اندر ہی ان کا کینسر بڑھ کر سٹیج فور سنوویئل سارکوما میں تبدیل ہو گیا، جس میں زندہ بچنے کے امکانات صرف 15فیصد تھے۔

(جاری ہے)

اس کے باوجود انہوں نے ہمت نہیں ہاری اور اپنے سفر کو سوشل میڈیا پر شیئر کرنا جاری رکھا۔ان کے مداحوں کے مطابق نتاشا کی ایمانداری اور بہادری نے انہیں لاکھوں لوگوں کے لیے امید اور حوصلے کی علامت بنا دیا۔ان کے سوشل میڈیا اکانٹس پر ہمیشہ ان کی بیماری کے خلاف جدوجہد، علاج کی تفصیلات، شکرگزاری اور زندگی کے بارے میں مثبت پیغامات دیکھنے کو ملتے تھے۔ان کی موت کی خبر ان کی ٹیم نے سوشل میڈیا کے ذریعے دی اور بتایا کہ نتاشا ایک خوبصورت روح تھیں، جو محبت، مہربانی اور خوشی سے بھری ہوئی تھیں، وہ اپنے فالوورز کی زندگیوں میں روشنی بن کر رہیں اور کینسر آگاہی کے لیے ایک بڑی آواز ثابت ہوئیں۔