عرفان خان کی اہلیہ ستاپا سکندر بھی حاجرہ یامین کی اداکاری کی معترف

ممبئی (اُردو پوائنٹ اخبارتازہ ترین - آن لائن۔ 10 جون2026ء) بالی ووڈ کے معروف اداکار مرحوم عرفان خان کی اہلیہ اور مصنفہ ستاپا سکندر نے پاکستانی اداکارہ حاجرہ یامین کی اداکاری کو سراہتے ہوئے انہیں ایک کم معروف مگر غیر معمولی صلاحیتوں کی حامل فنکارہ قرار دیا ہے۔ستاپا سکندر نے انسٹاگرام پر صحافی صادق سلیم کی ایک پوسٹ پر تبصرہ کرتے ہوئے جس میں حاجرہ یامین کی ڈرامہ ’ڈاکٹر بہو‘ میں اداکاری کا ذکر کیا گیا تھا کہا کہ وہ حاجرہ یامین کی صلاحیتوں سے بے حد متاثر ہیں۔

انہوں نے لکھا کہ میں نے انہیں ایسے ڈراموں میں بھی دیکھا ہے جہاں ان کے ساتھ کام کرنے والے اداکار زیادہ مضبوط نہیں تھے لیکن حاجرہ اپنی اداکاری اور کردار کی تیاری میں اس قدر پختہ ہوتی ہیں کہ انہیں اچھے ساتھی اداکار کی ضرورت محسوس نہیں ہوتی۔

(جاری ہے)

ستاپا سکندر کے مطابق جب حاجرہ یامین کو مضبوط اور باصلاحیت ساتھی اداکار میسر آتے ہیں تو مناظر کی تاثیر اور کرداروں کے درمیان کیمیا نمایاں طور پر بہتر ہو جاتی ہے۔

انہوں نے ’ڈاکٹر بہو‘ کو ایک عمدہ تحریر اور بہترین ہدایت کاری کا حامل ڈرامہ بھی قرار دیا۔صادق سلیم نے ستاپا سکندر کے تبصرے کا جواب دیتے ہوئے کہا کہ حاجرہ یامین یہ تعریف پڑھ کر یقیناً خوش ہوں گی اور ایسا ہی ہوا۔حاجرہ یامین نے ستاپا سکندر کا شکریہ ادا کرتے ہوئے لکھا کہ ان کے لیے یہ تعریف بے حد خاص ہے کیونکہ وہ طویل عرصے سے مرحوم عرفان خان کی اداکاری کی مداح اور طالب علم رہی ہیں۔