نادیہ حسین نے اپنے بیان پر مولانا طارق جمیل کے درس کا حوالہ شیئر کر دیا

․کراچی (اُردو پوائنٹ اخبارتازہ ترین - این این آئی۔ 30 اگست2021ء) پاکستان کی سپر ماڈل و اداکارہ نادیہ حسین نے شوہر کے کاموں سے متعلق دیئے گئے اپنے بیان پر مولانا طارق جمیل کے ایک درس سے لیا گیا کلپ شیئر کر دیا ۔گزشتہ دنوں نادیہ حسین اور ان کے شوہر کی جانب سے ایک نجی ٹی وی چینل کو ایک ساتھ انٹرویو دیا گیا۔اس دوران شو کی میزبان نے نادیہ حسین سے سوال کیا کہ کیا شوہر کے کام کرنا عورت پر فرض ہے کیا عورت کو اپنے شوہر کے کام کرنے چاہئیں ۔

شو کی میزبان نے نادیہ حسین سے پوچھا کہ کیا وہ اپنے شوہر کے کام کرتی ہیں جس پر نادیہ حسین کا جوب میں کہنا تھا کہ شوہر کے کام کرنا فرض نہیں ہے، وہ اپنے شوہر کے کام کیوں کریں، ان کا شوہر ان کا بچہ نہیں ہے بلکہ ان کا پارٹنر ہے۔نادیہ حسین کے اس جواب پر انٹرنیٹ صارفین کی جانب سے ان کی تعریف اور ان پر تنقید دونوں کی گئی۔

(جاری ہے)

چند سوشل میڈیا صارفین کی جانب سے نادیہ حسین کے اس جواب کو درست قرار دیا گیا جبکہ کچھ نے ان پر لبرل کا ٹھپہ لگاتے ہوئے تنقید کا نشانہ بنایا۔

نادیہ حسین کی جانب سے اپنے بیان سے متعلق اب اسلامی تعلیمات کا حوالہ دینے کیلئے معروف اسلامی اسکالر مولانا طارق جمیل کے ایک بیان سے لیا گیا ویڈیو کلپ اپنے انسٹا اکاونٹ پر شیئر کیا گیا ہے۔نادیہ حسین کا اپنی انسٹا پوسٹ پر مولانا طارق جمیل کا عورتوں کے حقوق سے متعلق دیئے گئے بیان کا کلپ شیئر کرتے ہوئے لکھنا ہے کہ اب بولو!بیوی کی ذمہ داری شوہر کی روٹی بنانا نہیں ہے، شوہر کے اور اس کے خاندان کے کام کرنا بیوی پر فرض نہیں ہے۔

نادیہ حسین کا کہنا تھا کہ شوہر کے کام ضرور کرو مگر شوق اور محبت سے، خصوصا اس شوہر کے جو خود اور اس کا خاندان بھی آپ کو محبت دیتا ہو، کوئی زور زبردستی نہیں کر سکتا، اپنے لئے لڑنا سیکھیں۔انہوں نے لکھا کہ عورت کا اپنا الگ کمرہ، الگ گھر ہونا ہر شادی شدہ عورت کا حق ہے۔