ساجد حسن نے بھارت مخالف کردارادا کرنے سے انکارکرنے کی وجہ بتا دی

لاہور (اُردو پوائنٹ اخبارتازہ ترین - این این آئی۔ 24 مئی2024ء) پاکستان شوبز انڈسٹری کے سینئر اداکار ساجد حسن نے بھارت مخالف کردار ادا کرنے سے انکار کرنے کی وجہ بتا دی۔ ساجد حسن نے حال ہی میں ایک پوڈ کاسٹ میں بطور مہمان شرکت کی جہاں اٴْنہوں نے اپنے شوبز کیریئر کے بارے میں بہت دلچسپ گفتگو کی۔اٴْنہوں نے بتایا کہ میں نے کچھ دنوں پہلے فلم’ٹائیگر 3‘ دیکھی جس میں کچھ بھی نہیں ہے بس مسلسل پوری فلم میں پاکستان کے خلاف باتیں کی گئی ہیں اور مجھے یہ چیز پسند نہیں ہے۔

(جاری ہے)

اداکار نے کہا کہ اس طرح کی فلموں اور ڈراموں میں ایک اداکار کے ساتھ بہت ناانصافی ہوتی ہے اسی لیے میں ذاتی طور پر ایسے کردار کرنا پسند نہیں کرتا۔ اٴْنہوں نے بتایا کہ جب میں انڈسٹری میں نیا تھا تو ہم پر بھی اس قسم کے کردار کرنے کا بہت دباؤ تھا لیکن میں نے انکار کر دیا کیونکہ دوسرے ممالک کے لوگوں کے ساتھ آپ کا رابطہ اور رشتہ متاثر نہیں ہونا چاہیے چاہے وہاں کے لوگ آپ کے لیے ناگوار ہی کیوں نہ ہوں۔ساجد حسن نے مزید کہا کہ پاکستانی قوم کو قائد اعظم کی مسلسل جدوجہد سے ملنے والی اس آزادی کی قدر کرنی چاہیے کیونکہ میں بھارت گیا ہوں اور میں نے وہاں سانس لینے میں گھٹن محسوس کی ہے۔