مکافاتِ عمل ضرور ہوتا ہے، ایسے سینئرز پر دھیان نہ دیں، عروہ حسین نے علیزے کی حمایت کردی

کراچی (اُردو پوائنٹ اخبارتازہ ترین - این این آئی۔ 22 جولائی2025ء)اداکارہ عروہ حسین نے انڈسٹری میں ہونے والے ناروا سلوک پر ساتھی اداکارہ علیزے شاہ کی حمایت کردی۔انسٹاگرام پر عروہ حسین نے اسٹوری شیئر کرتے ہوئے لکھا، آپ نے جو کہا میں نے وہ سب سنا، میں سمجھ سکتی ہوں،آپ ہمت رکھیں اور ایسے سینئرز پر دھیان نہ دیں، عزت زبردستی حاصل نہیں کی جاتی، عزت کمانی پڑتی ہے، سینئر ہونے سے عزت نہیں ملتی۔

(جاری ہے)

‘انہوں نے لکھا کہ آپ انڈسٹری چھوڑنے کا نہ سوچیں کیونکہ ایسے لوگ یہی چاہتے ہیں بلکہ ان لوگوں کا سوچیں جو آپ کو پسند کرتے ہیں۔ یاد رکھیں آپ کا ہنر اور حوصلہ بہت سے لوگوں کو متاثر کرتا ہے، بس ان لوگوں کو اپنے ذہن میں رکھیں اور آگے بڑھتے رہیں۔عروہ حسین نے علیزے کی ہمت بڑھاتے ہوئے یہ بھی لکھا کہ آپ اپنی سچائی اور صداقت کے ساتھ آگے بڑھتے رہیں، جس سے یہ لوگ خطرہ محسوس کرتے ہیں اور آپ بالکل پریشان نہ ہوں، مکافاتِ عمل ضرور ہوتا ہے۔