سعودی کمپنی ELM اور Abacus کنسلٹنگ کے وفد کا پی آئی ٹی بی کا دورہ، آئی سی ٹی اقدامات کا جائزہ

لاہور (اُردو پوائنٹ اخبارتازہ ترین۔ 05 مئی2025ء) حکومت پنجاب کی جانب سے متعارف کرائے گئے آئی سی ٹی اقدمات بارے آگاہی حاصل کرنے کیلئے سعودی عرب کی معروف کمپنی ELM کے وفد نے Abacus Consulting کے نمائندوں کے ہمراہ پنجاب آئی ٹی بورڈ کا دورہ کیا۔ وفد میں سینیئر ایگزیکٹو ڈائریکٹر Abacus کنسلٹنگ نوید حسین، وائس پریذیڈنٹ پبلک ریلیشنز سکندر جمشید اور ELM کے سینیئر بزنس اینالسٹ مصطفیٰ غویلی شامل تھے۔

پی آئی ٹی بی ڈائریکٹر جنرل ای گورننس ساجد لطیف نے پی آئی ٹی بی کے اہم منصوبوں پر روشنی ڈالی جن میں شہریوں کیلئے ای خدمت مراکز، کاروباری سہولیات، نوجوانوں کو بااختیار بنانے کے پروگرامز اور حکومتی نظام کی آٹومیشن جیسے اقدامات شامل ہیں۔ انہوں نے عوامی سہولت کیلئے قائم کردہ ای خدمت مراکز کا خصوصی ذکر کیا جو پنجاب بھر میں شہریوں کو ایک چھت تلے مختلف خدمات فراہم کر رہے ہیں۔

(جاری ہے)

وفد نے ای خدمت مرکز، پنجاب ڈیٹا سینٹر اور پنجاب ماس ٹرانزٹ اتھارٹی کا بھی دورہ کیا جہاں انہیں سرکاری نظام میں ڈیجیٹائزیشن کے مختلف پہلوؤں کے متعلق آگاہ کیا گیا۔ اس موقع پر پی آئی ٹی بی ڈائریکٹر سکلز ڈویلپمنٹ وِنگ احمد اسلام اور سینیئر پروگرام مینیجر محمد اشفاق ٹوانہ بھی موجود تھے۔ دورے کا مقصد پنجاب کی ٹیک پالیسی اور ڈیجیٹل اقدامات بارے جاننا، پی آئی ٹی بی کے وضع کردہ پروگرامز کا مشاہدہ کرنا اور مستقبل میں تعاون  بڑھانے کے امکانات کا جائزہ لینا تھا۔

اس حوالے سے پی آئی ٹی بی چیئرمین فیصل یوسف کا کہنا تھا کہ یہ ہمارے لیے اعزاز کی بات ہے کہ بین الاقوامی سطح پر پاکستان کے ڈیجیٹل اقدامات کو تسلیم کیا جا رہا ہے۔ ہمارا ویژن ہے کہ ہم ٹیکنالوجی کے ذریعے عوام کی زندگیوں میں بہتری لائیں اور امید ہے کہ یہ دورہ مستقبل میں مضبوط شراکت داری کی بنیاد بنے گا۔