سیکرٹری خارجہ سہیل محمود کا پاکستان، چین اور افغانستان کے درمیان تعاون کو مزید وسعت دینے کی اہمیت پر زور

اسلام آباد ۔ (اُردو پوائنٹ اخبارتازہ ترین - اے پی پی۔ 22 اکتوبر2019ء) سیکرٹری خارجہ سہیل محمود نے پاکستان، چین اور افغانستان کے درمیان تعاون کو مزید وسعت دینے کی اہمیت پر زور دیتے ہوئے کہا ہے کہ اس سے خطے میں امن اور سلامتی کے اہداف سمیت تجارت، اقتصادی ترقی اور خوشحالی آئے گی۔ وہ پیر کو یہاں افغانستان، چین اور پاکستان کے سفارت کاروں کے لئے سہ ملکی سفارتی ورکشاپ کی افتتاحی تقریب سے خطاب کر رہے تھے۔

اس ضمن میں منعقدہ خصوصی تقریب میں چین اور افغانستان کے ڈپٹی ہیڈز آف مشنز کے علاوہ وزارت خارجہ کے اعلی حکام اور دیگر معزز شخصیات نے شرکت کی۔ تینوں ممالک کے کل 33 سفارتکار دو ہفتے پر مشتمل اس ورکشاپ میں شرکت کررہے ہیں۔ ورکشاپ کے شرکاء کا خیرمقدم کرتے ہوئے سیکرٹری خارجہ سہیل محمود نے تینوں ممالک کے وزراء خارجہ کے مذاکرہ کے تحت باہمی تعاون کو مزید گہرا کرنے کی اہمیت پر زوردیا جو امن، سلامتی، تجارت اور معاشی ترقی سمیت علاقائی روابط بڑھانے اور خوشحالی کے یکساں اہداف کے حصول میں کلیدی ہے۔

(جاری ہے)

انہوں نے نوجوان سفارتکاروں پر زوردیا کہ آنے والے ماہ وسال میں اس سہہ ملکی تعاون کو مزید فروغ دینے کے لئے اپنی صلاحیتیں بروئے کار لائیں۔ چین اور پاکستان کے درمیان سدابہار اور آزمودہ کثیر الجہتی سٹریٹجک تعاون کو بیان کرتے ہوئے سیکرٹری خارجہ نے کہاکہ پاکستان تعلیم، ٹیکنالوجی اور تخلیق کے شعبوں میں تعاون کو مزید گہرا اور وسیع کرنے کے لئے پرعزم ہے۔

انہوں نے کہاکہ پاکستان ’بیلٹ اینڈ روڈ‘ (بی۔آر۔آئی) منصوبے کے اولین شرکاء میں شامل ہے اور سی پیک ’بی۔آر۔آئی‘ کا فلیگ شپ منصوبہ ہے جس میں بڑی حد تک پیش رفت ہوچکی ہے۔ پاکستان اور افغانستان میں قریبی تاریخی تعلقات کا حوالہ دیتے ہوئے سیکرٹری خارجہ سہیل محمود نے کہاکہ دونوں برادر ہمسایہ اسلامی ممالک کے درمیان جغرافیہ، تاریخ، مذہب، زبان اور خون کے رشتے دونوںممالک کے درمیان پائیدار اور وسیع تعلقات کی بنیاد فراہم کرتے ہیں۔

انہوں نے کہاکہ پاکستان افغانستان میں امن، استحکام اور مفاہمت کے لئے اپنے پختہ وعدے پرکاربند ہے۔ چین کی ڈپٹی ہیڈ آف مشن محترمہ پینگ چٴْن ژو اور افغانستان کے ناظم الامور احمد شاکر قرار نے افتتاحی تقریب سے خطاب کرتے ہوئے سہہ ملکی تعاون کی اہمیت پر زور دیا۔ انہوں نے سفارت کاروں کی استعداد کار میں اضافے کے لئے اپنی نوعیت کی اس اولین ورکشاپ کے انعقاد کے پاکستان کے اقدام کا خیرمقدم کیا۔

فارن سروس اکیڈمی کے ڈائریکٹر جنرل آفتاب احمد کھوکھر نے خطبہ استقبالیہ میں کہاکہ فارن سروس اکیڈمی درخشاں تاریخ رکھنے والا قومی ادارہ ہے جسے بڑی تعداد میں ملکی اور غیرملکی سفارت کاروں کی تربیت کا اعزاز حاصل ہے۔ دو ہفتے کی تربیتی ورکشاپ کے نکات پرروشنی ڈالتے ہوئے انہوں نے بتایا کہ ترقی پذیر ممالک کے نکتہ نگاہ سے عصرحاضر کے سفارتی علم سے آگہی کے علاوہ تینوں ممالک کے درمیان تعلقات کو مزید مضبوط بنانا، پاکستان کی صنعتی، کمرشل اور ثقافتی صلاحیتوں کو اجاگر کرنا اور دستیاب مواقع سے استفادہ کے امکانات سے روشناس کرانا ان نکات میں شامل ہے۔