سشمیتا سین کی بیٹی کا انسٹاگرام اکاؤنٹ ہیک ہوگیا

ممبئی (اُردو پوائنٹ اخبارتازہ ترین - این این آئی۔ 16 دسمبر2020ء) بولی وڈ اداکارہ سشمیتا سین کی بیٹی رینی کا انسٹاگرام اکاؤنٹ ہیک ہوگیا اور اداکارہ نے اپنے مداحوں اور فالوورز کو اس حوالے سے آگاہ کیا۔انڈیا ٹوڈے کی رپورٹ کے مطابق سشمیتا سین نے لکھا کہ رینی کا انسٹاگرام اکائونٹ کسی بے وقوف نے ہیک کرلیا ہے لیکن ان کی بیٹی نیا انسٹاگرام اکاؤنٹ بنانے پر خوش ہے۔

سشمیتا سین نے اپنے مداحوں کے ساتھ یہ خبر شیئر کرتے ہوئے لکھا کہ ' میری بیٹی رینی کا انسٹاگرام کا اکاؤنٹ کسی بیوقوف نے ہیک کرلیا ہے جسے اب تک یہ احساس نہیں ہوا کہ رینی اپنا نیا انسٹاگرام بناچکی ہے اور خوش ہے۔انہوں نے لکھا کہ مجھے ہیک کرنے والے شخص کے لیے برا محسوس ہورہا ہے۔سشمیتا سین نے مذکورہ کیپشن کیساتھ ساتھ رینی کے انسٹاگرام پیج کا اسکرین شاٹ بھی شیئر کیا۔

(جاری ہے)

تاہم اداکارہ کے فالوورز نے انسٹاگرام اکاؤنٹ ہیک ہونے کی خبر شیئر کرنے کے بعد تشویش کا اظہار بھی کیا۔ایک مداح نے تجویز دی کہ آپ پولیس کے سائبر سیل میں شکایت درج کرائیں۔ایک اور مداح نے کہا کہ اس حوالے سے انسٹاگرام میں رپورٹ کریں تو کسی نے کہا کہ اب رینی کا انسٹاگرام اکاؤنٹ پرائیویٹ ہے۔سشمیتا سین کی بیٹی رینی 'سٹہ بازی' نامی مختصر فلم میں اداکاری کا پہلا ڈیبیو کرنے کے لیے تیار ہیں۔

یہ فلم ایک فیملی ڈراما ہے اور رینی اس میں دیا مہتا کا کردار ادا کررہی ہیں جو گھر کی باغی بیٹی ہے۔اس فلم کی ہدایات کبیر کھرانا دے رہے ہیں جبکہ سمرن لکھن پال، رام نیک سوہنے اور پنکج رنگٹا پروڈیوس کررہے ہیں۔یہ مختصر رواں برس دسمبر میں ریلیز ہوگی۔خیال رہے کہ رینی سین، اداکارہ سشمیتا سین کی بڑی بیٹی ہیں، جنہیں اداکارہ نے سال 2000 میں گود لیا تھا اور انہوں نے دوسری بیٹی علیسا کو 2010 میں گود لیا تھا۔