عینا آصف کے ساتھ جوڑی بنانے پر خوشی ہوتی ہے، ثمرجعفری

کراچی (اُردو پوائنٹ اخبارتازہ ترین - آن لائن۔ 24 جون2025ء) ابھرتے ہوئے اداکار ثمر جعفری نے کہا ہے کہ عینا آصف کے ساتھ رومانوی جوڑی بنانے پر انہیں خوشی ہوتی ہے، انہیں لوگوں کی باتوں سے دکھ نہیں ہوتا، ان کے درمیان اچھی دوستی ہے۔ثمر جعفری نے حال ہی میں ملیحہ رحمن کو انٹرویو دیا، جس میں انہوں نے مختلف معاملات پر کھل کر بات کی۔عینا آصف کے ساتھ تعلقات اور دوستی سے متعلق پوچھے سوال پر بھی ثمر جعفری نے بات کی اور بتایا کہ دونوں کی عمر میں بہت بڑا فرق ہے لیکن اس باوجود ایسا لگتا ہے کہ وہ ہم عمر ہیں۔

ان کے مطابق عینا آصف کے ساتھ گفتگو کرتے وقت انہیں کبھی ایسا محسوس نہیں ہوتا کہ وہ خود سے کم عمر لڑکی کے ساتھ بات کر رہے ہیں، وہ کافی سمجھدار ہیں۔ان کا کہنا تھا کہ وہ اور عینا آصف پروفیشنل اداکار ہیں، انہیں لوگوں کی باتوں اور جوڑیاں بنانے سے کوئی فرق نہیں پڑتا، وہ ایسی باتوں پر توجہ بھی نہیں دیتے۔

(جاری ہے)

انہوں نے بتایا کہ انہیں خوشی ہے کہ لوگوں کا ان کا کام پسند آتا ہے، وہ آن اسکرین اتنا اچھا کام کرتے ہیں کہ لوگ انہیں پسند کرتے اور دیکھنا چاہتے ہیں۔

ثمر جعفری نے کہا کہ اسکرین پر ان کی کیمسٹری کو پسند کرنے والے لوگ جب ان کی جوڑی بنانے کی باتیں کرتے ہیں تو انہیں ایسی باتیں سن کر خوشی ہی ہوتی ہے۔ان کے مطابق چوں کہ وہ پروفیشنل اداکار ہیں، ان کا کام لوگوں کو پسند آتا ہے، اسی لیے لوگ ان کی عینا آصف کے ساتھ جوڑی بناتے ہیں، اس لیے انہیں برا نہیں لگتا۔انہوں نے یہ بھی کہا کہ ان کی عینا آصف سے بہت اچھی دوستی ہے، دونوں کے درمیان صحت مند تعلقات ہیں۔

خیال رہے کہ پہلی بار عینا آصف اور ثمر جعفری نے مائی ری نامی ڈرامے میں جوڑی کا کردار ادا کیا تھا جب کہ حال ہی میں نشر کیے جانے والے ڈرامے پرورش میں بھی انہیں جوڑی کے طور پر دکھایا گیا ہے۔دونوں کو آن اسکرین رومانوی جوڑی دکھانے کو شائقین کی جانب سے پسند کیا جاتا رہا ہے اور چند دن قبل ہی عینا آصف نے بھی ایک انٹرویو میں کہا تھا کہ انہیں لوگوں کی جانب سے ثمر جعفری کے ساتھ جوڑی بنانے پر کوئی اعتراض نہیں ہے۔