معروف اداکار بدر منیر کی18ویں برسی 11اکتوبر کو منائی جائے گی

ٹھٹھہ صادق آباد(اُردو پوائنٹ اخبارتازہ ترین - این این آئی۔ 08 اکتوبر2026ء) معروف اداکار بدر منیر کی18ویں برسی 11اکتوبر کو منائی جائے گی۔چار دہائیوں تک فلم انڈسٹری پر راج کرنے والے بدر منیر کو پاکستانی پشتو فلموں کا دلیپ کمار کہا جاتا تھا۔انہوں نے اپنے کیرئیر کے دوران 650کے قریب پشتو، پنجابی اور اردو فلموں میں کام کیا جن میں 150 اردو اور پنجابی فلمیں ہیں۔

بدر منیر کی پہلی پشتو فلم یوسف خان،شیر بانو کراچی میں بنی اور ریلیز ہوئی۔لوک پشتو داستان پر مبنی یہ فلم بھر پور کامیاب رہی، فلم کے ہدایتکار عزیز تبسم اور ہیروئن یاسمین خان تھی۔بدر منیر کی پہلی اردو فلم جانور تھی ان کی ہیروئنوں میں یاسمین خان شہناز، ثریا خان، نجمہ، مسرت شاہین، دردانہ رحمان اور دیگر بہت سی شامل تھیں،بدر منیر کی مشہور پشتو فلموں میںدہقان،باز اور شہباز بدعملہ،یو بے تاج بادشاہ،الزام،داحق آواز،اودم آسمان، اوربل، دبدن،خانہ بدوش، داپختون تورہ، ٹوپک، زمان قانون اور آدم خان درخانئی شامل ہیں۔

(جاری ہے)

بدر منیر نے اپنے اداکاری کے شوق کو اپنانے کیلئے کراچی کے ایسٹرن فلم اسٹوڈیو میں ایک عرصہ مزدور کے طور کام کیا جبکہ اداکار وحید مراد کے دفتر میں بطور ڈرائیور اور دیگر کاموں کیلئے نوکری بھی کی۔بدر منیرکے والدبدین گائوں کی ایک مسجد میں پیش امام تھے۔بدر منیر 11 اکتوبر2008 کودل کا دورہ پڑ نے سے لاہور میں انتقال کر گئے ۔