عراق،مغربی شہر رمادی میں القاعدہ کا لیڈر ہلاک

ہفتہ 4 جنوری 2014 07:29

بغداد(اُردو پوائنٹ اخبار آن لائن۔4جنوری۔2014ء)عراق کے مغربی شہر رمادی میں القاعدہ کا لیڈر ابو عبدالرحمان البغدادی جھڑپوں کے دوران مارا گیا ہے۔العربیہ ٹی وی کی رپورٹ کے مطابق القاعدہ سے وابستہ گروپ ریاست اسلامی عراق اور شام (آئی ایس آئی ایل) کے جنگجووٴں اور فوج کے حمایت یافتہ اہل سنت قبائلیوں کے درمیان صوبہ الانبار کے شہری علاقوں پر کنٹرول کے لیے شدید لڑائی ہورہی ہے۔

صوبائی دارالحکومت رمادی اور دوسرے بڑے شہر فلوجہ کے بعض علاقوں پر القاعدہ کے جنگجووٴں نے گذشتہ کئی روز سے قبضہ کررکھا ہے۔عینی شاہدین اور سکیورٹی حکام کے مطابق سیاہ لباس میں ملبوس اسلامی عسکریت پسند رمادی شہر کی گلیوں اور بازاروں میں مسلح قبائلیوں کے ساتھ لڑائی میں مشین گنیں اور طیارہ شکن توپیں استعمال کررہے ہیں اور لڑائی میں القاعدہ کا حامی لیڈر ابو عبدالرحمان بغدادی ہلاک ہوگیا ہے۔

(جاری ہے)

الانبار میں عراقی سکیورٹی فورسز کے اہل سنت کے احتجاجی کیمپ کے خلاف کریک ڈاوٴن کے بعد سے امن وامان کی صورت حال ابتر ہوچکی ہے اور القاعدہ سے وابستہ جنگجووٴں کی قبائلیوں اور سرکاری فورسز کے ساتھ جھڑپیں جاری ہیں۔مقامی قبائلیوں نے صحافیوں کو بتایا ہے کہ بغداد حکومت اور قبائلی زعماء کے درمیان جمعرات کو القاعدہ کے مقابلے کے لیے ایک معاہدہ طے پانے کے بعد سے قبائلی جنگجو سامنے آئے ہیں۔

ریاست اسلامی عراق وشام سے وابستہ جنگجووٴں نے رمادی میں پولیس اسٹیشنوں اور سرکاری عمارتوں پر قبضہ کررکھا ہے۔ایک قبائلی سردار نے صحافیوں سے گفتگو کرتے ہوئے کہا کہ القاعدہ سے وابستہ اس تنظیم کے جنگجو شام کی سرحد کے نزدیک واقع الانبار میں اپنے قدم مضبوط بنانے کی کوشش کررہے ہیں لیکن القاعدہ کو صوبے میں قدم جمانے کی اجازت نہیں دی جاسکتی۔

اب ان کے ساتھ شدید لڑائی ہورہی ہے مگر یہ آسان نہیں ہے کیونکہ القاعدہ کے جنگجو رہائشی علاقوں میں چھپے ہوئے ہیں۔الانبار میں قبائلیوں کے القاعدہ مخالف اتحاد صحوہ (بیداری) قومی کونسل کے سربراہ احمد ابو ریشہ نے کہا ہے کہ آئی ایس آئی ایل کے جنگجووٴں کے خلاف ایک کھلی جنگ ہورہی ہے اور قبائلیوں نے مقامی پولیس کی مدد سے القاعدہ گروپ کے خلاف ایک بلاک قائم کر لیا ہے۔

Facebook Twitter Google + Share on Whatsapp

عراق،مغربی شہر رمادی میں القاعدہ کا لیڈر ہلاک

متعلقہ عنوان :