جدیدمعیاری ، بامقصد اورانفارمیشن ٹیکنالوجی کی تعلیم کے بغیرکوئی ملک اور قوم ترقی کی منازل طے نہیں کرسکتی،محمدمطلوب انقلابی

میرپور(اُردو پوائنٹ اخبار تازہ ترین۔10ستمبر۔2014ء) آزادکشمیر کے وزیرہائیرایجوکیشن محمدمطلوب انقلابی نے کہاہے کہ جدیدمعیاری ، بامقصد اورانفارمیشن ٹیکنالوجی کی تعلیم کے بغیرکوئی ملک اور قوم ترقی کی منازل طے نہیں کرسکتی۔ وزیراعظم چوہدری عبدالمجید کی سربراہی میں حکومت آزادکشمیر میں ای گورنس کے فروغ کے لیے بھرپور اقدامات اٹھارہی ہے۔

محکمہ صحت عامہ، تعلیم، مال ، جوڈیشری ، پی این ڈی،پولیس، پی ایس سی سمیت دیگر اداروں کو انفارمیشن ٹیکنالوجی سے منسلک کردیاگیاہے۔ پاکستان اور آزادکشمیر میں جمہوری استحکام کے لیے بہتری کی گنجائش ہے۔ضد اور انا کی سیاست سے ملک کومعاشی نقصان ہورہاہے۔ جمہوری عمل کے لیے صاف وشفاف انتخابی اصلاحاتی کی بھی ضرورت ہے۔ جمہوریت کے لیے محترمہ بے نظیربھٹو نے جان کی قربانی دے دی۔

(جاری ہے)

پیپلزپارٹی نے انتخابی ترجیحات میں انرجی، ایجوکیشن، انوائرمنٹ اور ایکولٹی کو اپنے منشور میں رکھا تھا۔ حکومت آزادکشمیر ملک اورملت کی بہتری کے لیے اٹھائے جانے والے ہراقدام کو قدرکی نگاہ سے دیکھتی ہے۔ پرائیویٹ اور کمیونٹی کے تعاون سے عوامی فلاحی منصوبوں کی ہرممکن حوصلہ افزائی کریں گے بلکہ انھیں ممکنہ حد تک سہولیات ومراعات بھی فراہم کریں گے۔

ای میرپور انفارمیشن ٹیکنالوجی کا بہترین پراجیکٹ ہے جس سے میرپورکی پہچان اورمعلومات دنیامیں بیٹھاہرشخص دیکھ سکے گا۔ ان خیالا ت کااظہارانھوں نے میرپورسائنس اینڈ انفارمیشن ٹیکنالوجی یونیورسٹی (مسٹ) میں پاکستان انسٹیٹیوٹ آف آئی سی ٹی ایس ڈویلپمنٹ کے زیراہتمام ای میرپورپراجیکٹ کی افتتاحی تقریب سے بحیثیت مہمان خصوصی خطاب کرتے ہوئے کیا۔

تقریب سے مسٹ یونیورسٹی کے وائس چانسلر پروفیسر ڈاکٹرراجہ حبیب الرحمان، پی ایس اے کے مرکزی صدر سید عمارحسین جعفری، پی ایس اے آزادکشمیر کے صدرمقصود حسین آسی، پروفیسر صغیرحسین آسی، پروفیسر عابدجنجوعہ نے بھی خطاب کیاجبکہ تقریب میں ڈویژنل ڈائریکٹر کالجز پروفیسر محترمہ انجم افشاں نقوی، پروفیسر ڈاکٹر شوکت، ڈین سائنس پروفیسر ڈاکٹر مشتاق ملک، پروفیسر ڈاکٹر سروراحمد، ڈین آرٹس منیر احمد چوہدری، پروفیسر ڈاکٹر ریحانہ اصغر، پروفیسر رقیہ خانم، پراجیکٹ ڈائریکٹریونیورسٹی فضل حسین چوہدری، ڈائریکٹرورکس راجہ عرفان حمید، ایڈمنسٹریٹر میونسپل کارپوریشن الحاج غلام رسول عوامی، اسٹیشن ڈائریکٹر ریڈیو محمدشکیل خان، ڈائریکٹر(ر) زراعت مرزاخالد محمود کے علاوہ مختلف سکولوں اور کالجوں کے اساتذہ ، سول سوسائٹی، این جی اوز کے افراد نے بڑی تعداد میں شرکت کی۔

تقریب سے خطاب کرتے ہوئے وزیرہائیرایجوکیشن محمدمطلوب انقلابی نے کہاکہ قائد اعظم محمدعلی جناح اور شہید ذوالفقار علی بھٹو کے پاکستان کوآج جن شدید چیلنجوں کا سامنا ہے اس کا مقابلہ کرنے کے لیے ہمیں بحیثیت قوم اپناکلیدی کردار اداکرناہوگا۔ انصاف، مساوات اور بھائی چارے کی فضاء کو فروغ دیناہوگا۔ تعلیمی نظام میں لائی گئی اصلاحات پرعملدرآمد کو یقینی بناناہوگا۔

حکومت اور سیاستدانوں کو اپنے اپنے حصہ کی ذمہ داریاں پوری دیانتداری سے سرانجام دیناہونگی۔ وزیرہائیرایجوکیشن محمدمطلوب انقلابی نے کہاکہ پیپلزپارٹی کی قیادت نے ہمیشہ غریب لوگوں کی فلاح وبہبود کے لیے اقدامات اٹھائے ہیں ۔طبقاتی نظام تعلیم کاخاتمہ پیپلزپارٹی کے منشور میں شامل ہے ۔ انھوں نے کہاکہ پیپلزپارٹی کی موجودہ حکومت نے آزادکشمیرمیں تعلیمی انقلاب برپاکردیاہے۔

آزادکشمیر کی یونیورسٹیوں میں جدید تحقیق کا کام بھی جاری ہے ہماری کوشش ہے کے آزادکشمیر کے اندر غریب لوگوں کے بچوں کو یکساں اعلیٰ تعلیم کے حصول کے مواقع ملیں۔ انھوں نے کہاکہ ای میرپور کے حوالے سے پی ایس اے کے پراجیکٹ کے لیے حکومت اور مسٹ یونیورسٹی بھرپورتعاون کرئیگی۔قبل ازیں پی ایس اے کے مرکزی صدر سید عمارحسین جعفری نے پی ایس اے کے زیراہتمام شروع کیے گئے پراجیکٹس کے بارے میں بریفنگ دی۔