پنجاب یونیورسٹی انسٹیٹیوٹ آف زوالوجی کے زیر اہتمام ہجرت کرنے والے پرندوں کے عالمی دن پر تقریب

لاہور (اُردو پوائنٹ اخبارتازہ ترین - اے پی پی۔ 15 مئی2024ء) پنجاب یونیورسٹی انسٹیٹیوٹ آف زوالوجی کے زیر اہتمام ہجرت کرنے والے پرندوں کے عالمی دن کی مناسبت سے لاہور سفاری زو میں نائٹ کیمپنگ ایونٹ کا انعقاد کیا گیا۔ تقریب میں ڈی جی وائلڈ لائف مدثر ریاض ملک،پروفیسر ڈاکٹر ذوالفقار علی، فیکلٹی ممبران اور طلبا طالبات نے بڑی تعداد میں شرکت کی۔

اس موقع پر پروفیسر ڈاکٹر ذوالفقار علی کا کہنا تھا کہ تقریب کا مقصد پرندوں کے ساتھ غیر اخلاقی رویے،جنگلی حیات کی کہانیاں، وائلڈ لائف فلموں اور شیر سفاری کو سمجھنا تھا۔انہوں نے کہا کہ اس تقریب نے جنگلی حیات میں دلچسپی رکھنے والے افراد، محققین اور طلبا کو ایک منفرد مہم جوئی کے لیے اکٹھا کیا جس سے ہجرت کرنے والے پرندوں کے شاندار سفر کو منانے اور ان کی رہائش گاہوں کو محفوظ رکھنے کی اہمیت بارے شعور اجاگر کرنے کا موقع فراہم کیا گیا۔

(جاری ہے)

طلبا کو ڈاکٹر رضوان اور پروفیسر ذوالفقار علی کی رہنمائی میں اپنی نیم فطری رہائش گاہ میں انگولیٹس کا مشاہدہ کرنے کا بھی موقع ملا۔مصنفین نے سامعین کو جنگلی حیات کی مہم جوئی اور تحفظ کی کوششوں کی دلفریب کہانیوں سے جوڑے رکھا۔ ڈاکٹر ذوالفقار علی نے کہا کہ ان کہانیوں نے نہ صرف تفریح فراہم کی بلکہ ہمارے قدرتی ورثے کو محفوظ رکھنے کی اہمیت کے بارے میں بیداری پیدا کرنے کے لیے ایک طاقتور ہتھیار کے طور پر بھی کام کیا۔

تقریب میں بدر منیر،بابر بخاری اور ٹیم نے وائلڈ لائف کی دستاویزی فلموں کا ایک سلسلہ پیش کیا ،شرکا نے بدر منیر کی بنائی ہوئی اور بابر بخاری کی ایڈٹ کردہ پاکستانی فلموں کے ذریعے ہجرت کرنے والے پرندوں کو درپیش چیلنجز اور ان کی بقا کو یقینی بنانے کے لیے بین الاقوامی تعاون کی ضرورت کے بارے میں آگہی حاصل کی۔تقریب کی خاص بات شیر سفاری تھی جہاں شرکا نے قدرتی ماحول میں ان شاندار شکاریوں کا مشاہدہ کرنے کے لیے رات کے مناظر کے ذریعے گائیڈڈ ٹور کا آغاز کیا۔

ڈی جی وائلڈ لائف مدثر ریاض ملک اور پروفیسر ذوالفقار علی کی رہنمائی میں طلبا نے کھلے آسمان تلے اپنے علاقے میں گھومتے ہوئے شیروں کی خوبصورتی اور طاقت کا خود مشاہدہ کیا۔بعد ازاں چڑیا گھر کے جنگلی حیات کے تحفظ اور تعلیم کے مشن میں ان کی لگن اور شراکت کے اعتراف میں اپنے تربیتی پروگرام مکمل کرنے والے انٹرنز کو سرٹیفکیٹ دیئے گئے۔پنجاب یونیورسٹی انسٹیٹیوٹ آف زوالوجی کے شرکا نے تقریب کے لئے بہترین انتظامات پر بدر منیر، مدثر ریاض ملک، ڈپٹی ڈائریکٹر سفاری زو تنویر جنجوعہ، ڈاکٹر رضوان اور تمام وائلڈ لائف عملہ کا شکریہ ادا کیا۔