لاہور آرٹس کونسل الحمرا کا کمرشل تھیٹر کی شاندار بحالی کا اعلان

لاہور (اُردو پوائنٹ اخبارتازہ ترین - اے پی پی۔ 19 مئی2026ء) لاہور آرٹس کونسل الحمرا نے معیاری کمرشل تھیٹر کے سنہری دور کی بحالی کے لیے ایک تاریخی اور غیر معمولی اقدام کا اعلان کر دیا ہے۔ محکمہ اطلاعات و ثقافت، حکومتِ پنجاب کے زیرِ سرپرستی شروع کیے جانے والے اس اہم منصوبے کا مقصد فیملی فرینڈلی، معیاری، اسکرپٹ بیسڈ اور بامقصد اسٹیج ڈراموں کے ذریعے تھیٹر کو ایک باوقار، مہذب اور تخلیقی شناخت فراہم کرنا ہے۔

اس سلسلے میں الحمرا نے اداکاروں، کامیڈینز، اسکرپٹ رائٹرز، ہدایتکاروں اور پروڈکشن سے وابستہ تخلیقی افراد کے لیے اوپن کال جاری کر دی ہے تاکہ ایک شاندار اور پروفیشنل تھیٹر پروڈکشن ٹیم تشکیل دی جا سکے۔ترجمان الحمرا کیمطابق ادارہ ایسے باصلاحیت افراد کی تلاش میں ہے جو اپنی تخلیقی صلاحیتوں، مزاحیہ انداز، اسٹیج کمانڈ اور فنی وژن کے ذریعے پاکستان میں معیاری تھیٹر کی نئی تاریخ رقم کر سکیں۔

(جاری ہے)

اعلامیے کے مطابق مرد و خواتین اداکار اور کامیڈینز کے لیے بہترین کامیڈی، مضبوط اسٹیج پریزنس اور لائیو پرفارمنس کا جذبہ ضروری قرار دیا گیا ہے، جبکہ اسکرپٹ رائٹرز سے توقع کی گئی ہے کہ وہ منفرد، معیاری، بامقصد اور خاندانی ماحول کے مطابق کہانیاں تخلیق کرنے کی صلاحیت رکھتے ہوں۔ اسی طرح اسٹیج ڈائریکٹرز کے لیے تخلیقی وژن، تکنیکی مہارت اور اعلی معیار کی اسٹیج پروڈکشن سے وابستگی لازمی قرار دی گئی ہے۔

ابتدائی شارٹ لسٹنگ کے لیے امیدواروں سے مختصر پروفائل یا سی وی، حالیہ تصاویر اور اپنی صلاحیتوں پر مبنی ویڈیو کلپ، اسکرپٹ یا پورٹ فولیو جمع کروانے کی ہدایت کی گئی ہے۔ترجمان الحمرا کیمطابق درخواستیں جمع کروانے کی آخری تاریخ 30 جون 2026 مقرر کی گئی ہے جبکہ آڈیشنز اور دیگر سرگرمیاں تاریخی الحمرا آرٹس سینٹر، دی مال لاہور میں منعقد ہوں گی۔ شارٹ لسٹ ہونے والے امیدواروں کے لیے رجسٹریشن لنکس اور آڈیشن شیڈول جلد الحمرا کے آفیشل ڈیجیٹل پلیٹ فارمز پر جاری کیے جائیں گے۔