اسپیس ایکس نے بڑا اسٹارشپ کامیابی سے لانچ کردیا

پروپیلر راکٹ بحرِہند میں گرے گا، اسپیس ایکس نے گزشتہ برس بھی کئی بڑے مشن بھیجے،رپورٹ

نیویارک(اُردو پوائنٹ اخبارتازہ ترین - این این آئی۔ 15 مارچ2024ء)ٹیسلا کے مالک ایلون مسک کے قائم کردہ ادارے اسپیس ایکس نے ایک بڑا اسٹارشپ راکٹ کامیابی سے لانچ کیا ہے۔غیرملکی خبررساں ادارے کے مطابق ماہرین کا کہنا تھا کہ گزشتہ برس اسپیس ایکس نے جو دو مشن لانچ کیے تھے ان سے تازہ ترین تجربہ زیادہ کامیاب دکھائی دے رہا ہے۔اسپیس ایکس نے بڑا اسٹارشپ راکٹ امریکی ریاست ٹیکساس میں واقع اپنے مرکز سے لانچ کیا۔

دو مراحل پر مشتمل راکٹ مقررہ فاصلے تک پہنچنے کے بعد کامیابی سے الگ ہوا اور خلا میں داخل ہوا۔اسپیس ایکس نے ایک بیان میں بتایا کہ جب یہ راکٹ دوبارہ زمین کے مدار میں داخل ہوا تو اس سے رابطہ منقطع ہوگیا۔خیال ہے کہ یہ راکٹ بحرِ ہند میں کسی مقام پر آ گرے گا۔اسپیس ایکس مصنوعی سیارے زمین کے مدار میں بھیجنے والے بڑے پلیٹ فارمز میں سے ہے۔

(جاری ہے)

ایلون مسک نے اس پلیٹ فارم کے ذریعے اپنی کاروباری سلطنت کو نمایاں حد تک مضبوط بنایا ہے۔اسپیس ایکس ان چند اداروں میں سے ہے جو کاروباری اور سیاحتی نقطہ نظر سے راکٹ لانچنگ میں نمایاں حد تک مسابقت پذیر ہیں۔ خلائی سیاحت کے بڑھتے ہوئے امکانات کے ساتھ ساتھ چاند کے لیے مشن بھیجنے کی بھی دوڑ سی شروع ہوچکی ہے۔ بہت سے ممالک جلد از جلد چاند کی سطح پر اپنا خلائی جہاز اتارنا چاہتے ہیں۔

تاریخ اشاعت: 2024-03-15