باکسر محمد علی عظیم ترین کھلاڑی تھے ،وزیراعظم عمران خان کا خراج عقیدت

اسلام آباد (اردو پوائنٹ تازہ ترین اخبار۔22جون 2020ء ) وزیر اعظم عمران خان نے عظیم باکسر محمد علی کو خراج عقیدت پیش کیا ہے۔ ٹوئٹر پر اپنے پیغام میں وزیر اعظم عمران خان نے لکھا کہ ’’ میری نگاہ میں وہ عظیم ترین کھلاڑی تھا، محض اس لئے نہیں کہ وہ قابل، ذہین اور نڈر تھا بلکہ اس لئے کہ اس کے اعتقادات مادی حصار سے آزاد ہوگئے اور وہ ایمان کی حد تک اس حقیقت کو پا گیا کہ جانوروں کے برعکس انسانوں کا وجود ایک مقصدِ عظیم سے جڑا ہوا ہے۔

(جاری ہے)

" محمد علی مرحوم کی شخصیت کے بارے میں وزیر اعظم عمران خان نے مزید کہا کہ ’’مصائب و آلام کے دور میں اپنے عقائد کی آبیاری کیلئے اس نے بطور کھلاڑی اپنی پیشہ وارانہ زندگی کے بہترین ایام اور پرکشش آمدن کو قربان کیا۔ اسکی قوت اور حوصلہ آج بھی دنیا بھر میں لوگوں کیلئے مشعلِ راہ ہیں‘‘۔ وزیر اعظم نے اپنی ٹویٹ میں باکسر محمد علی کا ایک وڈیو کلپ بھی ساتھ لگایا ہے۔