ہائیر ایجوکیشن کمیشن نے چیئرمین طارق بنوری کے سلب کیے اختیارات بحال کردئیے ،وکیل نے ہائی کورٹ کو آگاہ کر دیا

اسلام آباد (اُردو پوائنٹ اخبارتازہ ترین - این این آئی۔ 10 مئی2022ء) ہائیر ایجوکیشن کمیشن نے چیئرمین طارق بنوری کے سلب کیے اختیارات بحال کردئیے ،وکیل ہائیر ایجوکیشن کمیشن نے ہائی کورٹ کو چیئرمین کے اختیارات بحالی متعلق آگاہ کردیا ۔ منگل کو ڈاکٹر عطا الرحمن سمیت چار ممبران کی ایچ ای سی میں تعیناتی کے خلاف معاملے میں بھی اہم پیش رفت ہوئی ،چار ممبران میں سے ایچ ای سی کے ایک ممبر نادر پنجوانی نے استعفیٰ دے کر عدالت کا آگاہ کردیا ۔

(جاری ہے)

وکیل درخواست گزار عمر اعجاز گیلانی نے کہاکہ استعفیٰ سے درخواست گزاروں کو اخلاقی تقویت ملتی ہے، ایچ ای سی کے جس فیصلہ کو چیلنج کیا گیااس کو ادارے نے خود ہی واپس لے لیا درخواست نمٹا دیں۔ وکیل نے کہاکہ ایچ ای سی نے چیئرمین کے اختیارات کو بحال کر کے اچھا قدم اٹھایا- اس سے ہماری پٹیشن کو تقویت ملتی ہے۔جسٹس عامر فاروق نے استفسار کیاکہ آپ کی درخواست کامیاب ہو گئی، اب اس کو نمٹا دیں ۔وکیل نے کہاکہ ہماری درخواست میں اور بھی چیزیں مانگی گئی ہیں- عطا الرحمن کی تقرری خلاف قانون ہے اس لئے ہم کیس چلانا چاہتے ہیں۔ وکیل درخواست گزار نے کہاکہ قانونی جنگ جاری رکھیں گے۔عدالت نے فریقین سے دلائل طلب کرتے ہوئے سماعت 20 جون تک ملتوی کردی۔