نوجوانوں کو جدید علوم سے آراستہ کر کے ملک کی تقدیر بدلیں گے، چوہدری شافع حسین

لاہور (اُردو پوائنٹ اخبارتازہ ترین - اے پی پی۔ 22 اپریل2024ء) صوبائی وزیر صنعت و تجارت چوہدری شافع حسین کی زیر صدارت ٹیوٹا سیکرٹریٹ میں اجلاس منعقد ہوا،جس میں ایشیائی ترقیاتی بینک کے تعاون سے ٹیکنیکل ایجوکیشن کے فروغ کے جاری پروگرام پر پیش رفت کا جائزہ لیاگیا۔اجلاس میں چیف منسٹر سکل ڈویلپمنٹ انیشیٹو 2024 کے خدوخال پر بھی تبادلہ خیال کیاگیا۔

اجلاس میں صوبائی وزیر کو پرائس کنٹرول کے حوالے سے مجوزہ قانون سازی کے بارے تفصیلی بریفنگ دی گئی۔صوبائی وزیر صنعت و تجارت چوہدری شافع حسین نے اجلاس سے خطاب کرتے ہوئے کہا کہ اے ڈی پی کے تعاون سے جاری پروگرام کے تحت ٹیوٹا کے 16کالجز اور پی وی ٹی سی کے 3 اداروں کو سینٹرز آف ایکسیلنس بنایا جا رہا ہے،پروگرام کے تحت فوڈ پراسیسنگ،انفارمیشن کمیونیکیشن ٹیکنالوجی،ٹیکسٹائل اینڈ گارمنٹس اور کنسٹرکشن سیکٹرز سمیت8 شعبوں میں سنٹر آف ایکسیلنس بنیں گے اور ان اداروں کے لئے علیحدہ بورڈ آف مینجمنٹ بنے گا۔

(جاری ہے)

صوبائی وزیر صنعت نے کہا کہ چیف منسٹر سکل ڈویلپمنٹ انیشیٹو کے تحت مفت شارٹ کورسز کرائے جائیں گے،16 اضلاع کے35 اداروں میں عالمی سرٹیفیکیشن کے ساتھ 6 کورسز کرائے جائیں گے،کورسز 15مئی سے شروع ہوں گے،آئی ٹی ماہرین تربیت دیں گے۔صوبائی وزیر نے کہا کہ نوجوانوں کو جدید علوم سے آراستہ کر کے ملک کی تقدیر بدلیں گے۔صوبائی وزیر نے ہدایت کی کہ ٹیکنیکل یونیورسٹیوں اور اداروں میں طلبہ اور سٹاف کی بائیو میٹرک حاضری کا نظام جلد لا گو کیا جائے،نئی عمارتیں بنانے کی بجائے پہلے سے موجود اداروں کی اپ گریڈیشن پرفوکس کیا جائے،معیاری فنی تعلیم کے فروغ کے لئے ادارے مربوط انداز سے کام کریں۔

صوبائی وزیر نے ٹیوٹا کی ویب سائٹ میں بہتری لانے کی بھی ہدایت کی۔سیکرٹری صنعت و تجارت احسان بھٹہ،چئیرمین ٹیوٹا،ڈی جی انڈسٹریز،ٹیکنیکل یونیورسٹیوں کے وائس چانسلرز، سینئر اکنامک ایڈوائزر اور متعلقہ افسران نے اجلاس میں شرکت کی۔