سعودی عرب ، شاہی فرمان جاری، مختلف وزارتوں میں اہم تقرریاں

ریاض (اُردو پوائنٹ اخبارتازہ ترین - این این آئی۔ 16 مئی2024ء) سعودی فرمانروا خادم حرمین شریفین شاہ سلمان بن عبد العزیز نے متعدد شاہی فرامین جاری کیے ہیں۔عرب ٹی وی کے مطابق شاہ سلمان نے شہزادہ ڈاکٹر عبد العزیز بن محمد بن عبد العزیز عیاف آل مقرن کو اپنا مشیر خاص مقرر کیا ہے۔شاہ سلمان نے نائب وزیر نیشنل گارڈ عبد المحسن بن عبد العزیز التویجری کو اپنے منصب سے سبکدوش کرکے ایوان شاہی میں مشیر مقرر کردیا ہے۔

شاہی فرمان میں شہزادہ ڈاکٹر عبد العزیز بن محمد بن عبد العزیز بن عیاف آل مقرن کو نائب وزیر نیشنل گارڈ کی بھی ذمہ داری سونپی گئی ہے۔شاہ سلمان نے خالد بن محمد بن عبد العزیز العبد الکریم کو سیکریٹری کابینہ مقررکیا ہے۔شاہی فرمان میں شیہانہ بنت صالح بن عبد اللہ العزاز کو نائب سیکریٹری کابینہ کے منصب سے سبکدوش کرکے ایوان شاہی میں مشیر مقرر کر دیا گیا ہے۔

(جاری ہے)

اسی طرح مازن بن ترکی بن عبد اللہ السدیری کو کابینہ کونسل میں مشیر مقرر کیا گیا ہے۔انجینئر سامی بن عبد اللہ مقیم کو سعودی ڈیٹا اور مصنوعی ذہانت اتھارٹی میں نائب سربراہ جبکہ الربدی بن فہد بن عبد العزیز کو قومی ڈیٹا ادارے کے سربراہ کے طور پر مقرر کیا گیا ہے۔شاہ سلمان نے عبد المحسن بن سعد عبد المحسن کو نائب وزیر خزانہ، عبد العزیز بن سعود بن عبد العزیز الدحیم کو نائب وزیر تجارت، ڈاکٹر عبد اللہ بن علی بن محمد الاحمری کو نائب وزیر صنعت اور انجینئر انس بن عبد اللہ بن حمد الصلیع کو نائب وزیر سیاحت مقرر کیا ہے۔