چیئرمین ہایئر ایجوکیشن کمیشن کا نیشنل ووکیشنل اینڈ ٹیکنیکل ٹریننگ کمیشن ہیڈکوارٹرز کا دورہ

بدھ 29 جولائی 2026 12:08

اسلام آباد (اُردو پوائنٹ اخبارتازہ ترین - اے پی پی۔ 29 جولائی2026ء) چیئرمین ہایئر ایجوکیشن کمیشن (ایچ ای سی) پروفیسر ڈاکٹر نیاز احمد اختر نے نیشنل ووکیشنل اینڈ ٹیکنیکل ٹریننگ کمیشن (نیوٹیک) کے ہیڈکوارٹرز کا دورہ کیا، جہاں انہوں نے چیئرمین نیوٹیک انجینئر قمر الاسلام راجہ سے ملاقات کی۔ملاقات کے دوران دونوں اداروں کے درمیان باہمی تعاون کو مزید مضبوط بنانے، مہارتوں کی ترقی کو فروغ دینے، اعلیٰ تعلیم اور تکنیکی و پیشہ ورانہ تعلیم و تربیت کے شعبوں کے درمیان موثر روابط استوار کرنے اور طلبہ و گریجویٹس کو روزگار کی منڈی کی ضروریات سے ہم آہنگ مہارتوں سے آراستہ کرنے کے امور پر تفصیلی تبادلہ خیال کیا گیا۔

اس موقع پر اس امر پر اتفاق کیا گیا کہ ایچ ای سی اور نیوٹیک باہمی اشتراک کے ذریعے ایسے اقدامات کو فروغ دیں گے جن سے اعلیٰ تعلیم کے حامل نوجوانوں کی پیشہ ورانہ صلاحیتوں میں اضافہ ہو، صنعت اور تعلیمی اداروں کے درمیان روابط مضبوط ہوں اور قومی ترقی کی ترجیحات کے مطابق افرادی قوت تیار کی جا سکے۔

(جاری ہے)

دونوں سربراہان نے اس عزم کا اظہار کیا کہ جدید تقاضوں سے ہم آہنگ مہارتوں کی فراہمی، تکنیکی و پیشہ ورانہ تعلیم کے فروغ اور نوجوانوں کے لیے بہتر روزگار کے مواقع پیدا کرنے کے لیے مشترکہ کوششیں جاری رکھی جائیں گی۔