آزاد کشمیر کے بیشترعلاقوں میں تعلیمی سرگرمیاں بحال ، راولاکوٹ بدستور متاثر

منگل 25 اگست 2026 13:09

مظفرآباد/راولا کوٹ(اُردو پوائنٹ اخبارتازہ ترین - این این آئی۔ 25 اگست2026ء) مظفرآباد اور میرپور ڈویژنز میں معمولاتِ زندگی بحال ہونے کے ساتھ تعلیمی اداروں میں بھی سرگرمیاں دوبارہ شروع ہو چکی ہیں جبکہ راولاکوٹ کے طلباء کی تعلیم بدستور متاثر ہے،ان علاقوں میں طلبہ و طالبات نے اپنی پڑھائی کا سلسلہ دوبارہ سے جاری رکھا ہوا ہے جسے وہ نہایت خوش آئند قرار دے رہے ہیں جبکہ راولاکوٹ میں احتجاج کے باعث تعلیمی سرگرمیاں تاحال معطل ہیں جس کے باعث طلباء کو تعلیمی نقصان کا سامنا ہے اور ان کا قیمتی وقت ضائع ہو رہا ہے۔

تعلیمی سرگرمیاں بحال ہونے پرمظفرآباد اور میرپور کے طلباء کا کہنا ہے کہ تعلیمی ادارے دوبارہ کھلنے سے ہماری پڑھائی کا سلسلہ بحال ہو گیا ہے جس سے ہمیں اپنے تعلیمی اہداف پر توجہ دینے کا موقع مل رہا ہے۔

(جاری ہے)

انہوں نے کہا کہ پرامن ماحول میں تعلیم کا سلسلہ جاری رہنا ہمارے مستقبل کے لیے انتہائی ضروری ہے، اس لیے تعلیمی سرگرمیوں کا تسلسل برقرار رہنا چاہیے، ہم چاہتے ہیں کہ تعلیمی سرگرمیاں بلا رکاوٹ جاری رہیں تاکہ ہمارا قیمتی وقت ضائع نہ ہو اور ہم اپنی تعلیم مکمل کرکے مستقبل کے اہداف حاصل کر سکیں۔

راولاکوٹ کے طلبہ و طالبات نے کہا کہ احتجاج کے باعث ہمارے تعلیمی ادارے بند ہیں، جس سے ہماری پڑھائی کا شدید نقصان ہو رہا ہے اور ہمارا تعلیمی سال ضائع ہونے کا خدشہ ہے، تعلیمی سرگرمیاں متاثر ہونے سے ہمارا قیمتی وقت ضائع ہو رہا ہے، جس کا اثر ہمارے مستقبل اور کیریئر پر پڑ سکتا ہے۔انہوں نے اپیل کی کہ احتجاج اور دھرنے کو ختم کرکے تعلیمی ادارے کھولے جائیں تاکہ ہم اپنی تعلیم جاری رکھ سکیں اور اپنے مستقبل کے اہداف حاصل کرسکیں۔