کپل شرما کے کیفے پر پھر فائرنگ، بشنوئی گینگ نے ذمہ داری قبول کرلی

اوٹاوا (اُردو پوائنٹ اخبارتازہ ترین - این این آئی۔ 17 اکتوبر2025ء) کینیڈا کے شہر سرے میں بھارتی کامیڈین کپل شرما کے ’’کیپس کیفے‘‘پر ایک بار پھر فائرنگ کا واقعہ پیش آیا ہے۔بھارتی میڈیا کے مطابق رواں سال جولائی میں کھلنے والے کیپس کیفے کی عمارت پر ایک بار پھر فائرنگ کی گئی۔ یہ 4 ماہ کے اندر تیسری بار کیفے پر فائرنگ ہوئی ہے۔بھارتی میڈیا کے مطابق فائرنگ کے واقعہ کی ویڈیو بھی منظرِ عام پر آگئی ہے۔

ویڈیو میں دیکھا گیا کہ گاڑی میں بیٹھے حملہ آور نے کیفے پر متعدد گولیاں برسائیں جس کی وجہ سے عمارت کی کھڑکیاں ٹوٹ گئیں۔ خوش قسمتی سے کوئی زخمی نہیں ہوا۔بھارتی میڈیا کے مطابق اس فائرنگ واقعے کی ذمہ داری مبینہ طور پر گینگسٹر لارنس بشنوی کے گروپ سے وابستہ کولویر سدھو اور گولڈی ڈھِیلون نے سوشل میڈیا پر قبول کی ہے۔

(جاری ہے)

بھارتی میڈیا کے مطابق حملہ آوروں کی وائرل ایک مبینہ پوسٹ میں کہا گیا ہے کہ ہمارا عام عوام سے کوئی جھگڑا نہیں۔

جو لوگ ہمیں دھوکہ دیتے ہیں انہیں خبردار کیا جا رہا ہے اور جو بالی وڈ شخصیات ہمارے مذہب کے خلاف بولتی ہیں، انہیں بھی تیار رہنا چاہیے کیونکہ گولیاں کہیں سے بھی آ سکتی ہیں۔پولیس کا کہناہے کہ حملے کی وجوہات ممکنہ طور پر مالی تنازع اور مذہبی جذبات کو ٹھیس پہنچنے سے متعلق ہیں۔سری پولیس نے واقعے کی تحقیقات شروع کر دی ہیں، سی سی ٹی وی فوٹیجز حاصل کر لی گئی ہیں اور عینی شاہدین سے بیانات لیے جا رہے ہیں۔