خیبر پختونخوا حکومت نے ضلع بونیر میں گدیزی /سالارزی کونئی تحصیل کا درجہ دے دیا

پشاور(اُردو پوائنٹ اخبارتازہ ترین - این این آئی۔ 04 دسمبر2020ء) وزیراعلی خیبر پختونخوا کے معاون خصوصی برائے سی اینڈ ڈبلیو ریاض خان نے ممبر قومی ا سمبلی شیر اکبر خان کے ہمراہ ضلع بونیر میں نئی بننے والے تحصیل گدیزی /سالارزی کا باقاعدہ افتتاح کر دیا ہے۔افتتاحی تقریب گدیزی /سالارزی میں منعقدکئے گئی جس میں ڈپٹی کمشنر بونیر نصراللہ خان یوسفزئی، اسسٹنٹ کمشنر سید حماد حیدر سمیت علاقے کے عمائدین نے شرکت کی۔

گدیزی / سالارزی تحصیل بننے سے بونیر میں تحصیلوں کی مجموعی تعداد چھ ہوگئی ہے۔ اس موقع پر موجود علاقہ عمائدین نے صوبائی حکومت کا شکریہ اداکیا اور کہا کہ بونیر کے پسماندہ علاقے کے لوگوں کا یہ دیرینہ مطالبہ تھا جو کہ صوبائی حکومت نے پوراکر دیاہے اور اس کی وجہ سے علاقے میں تبدیلی کا آغاز ہوگا۔

(جاری ہے)

تقریب سے اپنے خطاب میں ریاض خان کا کہنا تھا کی سیاسی اختلافات سے مبرا ہوکر عوام کی خدمت کر رہے ہیں اور خدمات کا یہ سلسلہ جاری رہے گا۔

ان کا کہنا تھا کہ صوبائی قیادت خصوصا وزیر اعلی محمود خان کی خصوصی دلچسپی کی وجہ سے نئے تحصیل تشکیل مکمل ہوئی ہے۔ریاض خان کا کہنا تھا کہ نئے تحصیل کا بننا آسان کام نہیں تھا ۔ معاون خصوصی نے اس موقع پر وزیراعلی خیبر پختونخوا محمود خان کا خصوصی شکریہ اداکیاجنہوں نے صوبائی کابینہ میں لوگوں کی مشکلات کو دیکھتے ہوئے تحصیل بنانے کی منظوری دی۔

ریاض خان نے عمائدین علاقہ اور مقامی انتظامیہ کے افسران سے اپنے خطاب میں کہا کی ضلع بونیر کو ترقی کے دھارے میں شامل رکھنے اور جدید آمدو رفت یقینی بنانے کے لیئے سڑکوں کا جا ل بچھا یا جا رہا ہے۔ ان کا کہنا تھا کہ صوبائی حکومت کی بھر پور کوشش ہے کہ بونیر کو سوات موٹر وے سے مختلف انٹر چینچز کے ذریعے منسلک کیا جائے۔ اس سلسلے میں بابا سرائے سے کاٹلنگ انٹر چینچ پر کام کا اغاز جلد ہوگا۔

صوبائی ہائے ویز کے علاوہ دیہاتوں میں بھی سڑکوں کی تعمیر پر بھی خصوصی توجہ دے رہے ہیں تاکہ بونیر ضلع کے اندر اور بونیر کا صوبے کے دیگراضلاع کے ساتھ امدو رفت سہل ہو اور لوگوں کی مشکلات کم ہونے کے ساتھ ساتھ بونیر تیز ترین ترقی کے دور میںدوسرے علاقوں کے ہم پلہ رہے۔ریاض خان نے گدیزی / سالارزی کے لیے گرلز کالج بنانے کا بھی اعلان کیا۔ ضلعی افسران سے مخاطب ہوکر ان کا کہنا تھا کہ نئے انتظامی پوسٹوں پر تعیناتی جلد کی جائے گی۔ انہوں نے انتظامیہ پر زور دیا کہ ووہ عوامی خدمت کو اپنا شعار بنائیں اور اس میں کوتاہی برداشت نہیں کی جائے گی۔