اسلام آباد اور راولپنڈی میں بارش اور بوندا باندی سے موسم خوشگوار

اسلام آباد(اُردو پوائنٹ اخبارتازہ ترین - آن لائن۔ 01 اپریل2017ء) وفاقی دارالحکومت اسلام آباد اور راولپنڈی میں رات سے بارش اور بوندا باندی سے موسم خوشگوار ہو گیا ،بارش کے باعث اندرون و بیرون ملک آنے جانیوالی پروازیں تاخیر کا شکار ہوگئیں جبکہ محکمہ موسمیات کا کہنا ہے کہ منگل سے جمعرات کے دوران راولپنڈی/ اسلام آباد میں تیز ہواں اور گرج چمک کیساتھ بارش اور چند مقامات پر ژالہ باری اور بالائی پنجاب، بالائی خیبرپختونخوا اور کشمیر میں بعض مقامات پر بھی ژالہ باری کا بھی امکان ہے ۔

تفصیلات کے مطابق بے نظیر ایئرپورٹ کے رن وے پر جہاز کھڑے کرنے کی جگہ کم پڑ گئی ہے جس کے باعث متعدد پروازوں کا شیڈول متاثر ہوا ہے۔لندن،دوحہ،ریاض،کراچی کی دو پروازیں اڑان نہ بھر سکیں جبکہ جدہ،گلگت اور دمام سے اسلام آباد آنے والی پروازیں بھی تاخیر کا شکار ہوگئی ہیں۔

(جاری ہے)

ذرائع کے مطابق 8جہاز رن وے پر موجود ہیں اس لئے مزید جہاز کھڑے نہیں کئے جاسکتے۔

پروازیں لیٹ ہونے سے مسافروں کو مشکلات کا سامنا کرنا پڑا ۔ بارش کی وجہ سے دونوں شہروں میں نشیبی علاقے زیر آب آگئے جس سے ٹریفک کی روانی بھی بری طرح متاثر ہے۔ادھرمحکمہ موسمیات نے سوموار سے ملک کے بالائی اور وسطی علاقوں میں مغربی ہواں کے باعث گرج چمک کیساتھ بارش کی پیشن گوئی کرتے ہوئے کہا کہ سوموار سے جمعرات کے دوران خیبر پختونخوا، فاٹا، گلگت بلتستان اور کشمیرجبکہ منگل اور بدھ کے روز مالاکنڈ، ہزارہ ڈویژن اور کشمیر میں موسلادھار بارش کا بھی امکان ہے۔

راولپنڈی، سرگودھا، گوجرانوالہ، لاہور، فیصل آباد ڈویژن اور اسلام آباد میں کہیں کہیں تیز ہواوں/آندھی اور گرج چمک کیساتھ بارش جبکہ سوموار/منگل کے روز کوئٹہ، ژوب، ڈی جی خان، ملتان اور ساہیوال ڈویژن میں چند مقامات پر تیز ہواوں اور گرج چمک کیساتھ بارش ہو سکتی ہے۔منگل سے جمعرات کے دوران راولپنڈی/ اسلام آباد میں تیز ہواں اور گرج چمک کیساتھ بارش اور چند مقامات پر ژالہ باری کا بھی امکان ہے۔

اس دوران بالائی پنجاب، بالائی خیبرپختونخوا اور کشمیر میں بعض مقامات پر ژالہ باری کا بھی امکان ہے۔انہوں نے مزید بتایا کہ آئندہ 48گھنٹوں کے دوران خیبر پختونخوا، فاٹا ، بالائی پنجاب راولپنڈی ، سرگودھا،فیصل آباد، گلگت بلتستان اور کشمیر میں کہیں کہیں جبکہ کوئٹہ ، ژوب ، ڈیرہ غازی خان ، ملتان، ساہیوال میں چند مقامات پرتیز ہواں اور گرج چمک کیساتھ بارش کا امکان ہے۔ ملک کے دیگر علاقوں میں موسم خشک اور گرم رہے گا۔گزشتہ 24 گھنٹوں کے دوران ملک کے بیشتر علاقوں میں موسم خشک اور گرم رہا تاہم مالاکنڈ، ہزارہ، پشاور، راولپنڈی ڈویڑن فاٹا، کشمیر اور گلگت بلتستان میں چند مقامات پر تیز ہواوں اور گرج چمک کیساتھ ہلکی بارش ہوئی۔