سی ڈی اے کا ڈینگی کے سدباب کے لئے تمام دستیاب وسائل بروئے کار لانے کا فیصلہ

اسلام آباد (اُردو پوائنٹ اخبار تازہ ترین۔ 21 اکتوبر۔2015ء) وفاقی ترقیاتی ادارہ (سی ڈی اے) کا ڈینگی بخار کے خاتمے کے لئے بھرپور کوششیں اور ڈینگی بخار کے وائرس کے سدباب کے لئے تمام دستیاب وسائل بروئے کار لانے کا فیصلہ کیا گیا ہے‘ ڈینگی خاتمے میں شہریوں کا تعاون کلیدی کردار ادا کرے گا۔ سی ڈی اے ذرائع سے آن لائن کو حاصل ہونے والی معلومات کے مطابق ہیلتھ سروسز ڈائریکٹوریٹ اسلام آباد میں ڈینگی وائرس سے بچاؤ کے لئے موثر اقدامات کئے جا رہے ہیں اور اس سلسلے میں خصوصی ٹیمیں تشکیل دی گئی ہیں جو کہ ڈینگی مچھر کی افزائش کی ممکنہ 209 جگہوں پر سپرے جبکہ 262 فوگنگ کرے گی۔

آن لائن کو ذرائع نے مزید بتایا کہ اسلام آباد کے مختلف علاقوں سے ڈینگی لاروا کی ممکنہ موجودگی کو چیک کرنے کے لئے 25 ہزار 900 نمونے بھی لئے گئے ہیں۔

(جاری ہے)

سی ڈی اے کے مختلف شعبوں نے اسلام آباد میں بہنے والے 95 مختلف قدرتی ندی نالوں کی رکاوٹوں کو بھی دور کر کے پانی کے بھاؤ کو یقینی بنایا ہے تاکہ ڈینگی مچھر کی افزائش کا سدباب کیا جا سکے۔ مزید احتیاطی اور حفاظتی اقدامات کے تحت ان گھروں اور ان کے گرد و نواح میں بھی خصوصی سپرے کئے گئے ہیں جہاں گزشتہ سال ڈینگی کے متعدد کیسز سامنے آئے تھے۔

شہریوں میں آگاہی مہم کے تحت ڈینگی بخار اور اس سے بچاؤ کے لئے احتیاطی تدابیر پر مشتمل گزشتہ دو ماہ میں اب تک 20 ہزار پمفلٹس تقسیم کرنے کے علاوہ پانچ سو سے زائد مختلف نمایاں مقامات پر بینرز بھی آویزاں کئے گئے ہیں۔ اس حوالے سے ممبر ایڈمن و سٹیٹ عامر احمد علی نے بھی تمام متعلقہ شعبوں کو ہدایت کی ہے کہ وہ روزانہ کی بنیاد پر شہر کی صفائی‘ خود رو جھاڑیوں کی تلفی‘ پانی کی سپلائی اور سیوریج کی لائنوں کی ضروری مرمت بروقت کریں۔

ذرائع نے مزید آن لائن کو بتایا کہ سی ڈی اے انتظامیہ نے دکانوں‘ بیکریوں‘ ریسٹورانوں اور ٹائر شاپس کے مالکان کو بھی ہدایت کی ہیں کہ وہ ڈینگی سے بچاؤ کے لئے تمام حفاظتی تدابیر اختیار کریں اور کسی بھی بے احتیاطی کی صورت میں سی ڈی اے میونسپل بائی لائز کی روشنی میں ان کے خلاف سخت کارروائی عمل میں لائی جا سکتی ہے۔ سی ڈی اے انتظامیہ نے ڈینگی مچھر سے بچاؤ کے لئے شہریوں کو بھی حفاطتی تدابیر اختیار کرنے کے لئے کہا ہے جس میں دروازوں اور کھڑکیوں پر جالی لگانے‘ صاف پانی کو ڈھانپ کر رکھنے‘ پوری آستینوں والے کپڑے پہننے اور گھروں‘ گلیوں اور سڑکوں پر پانی کو کھڑا نہ ہونے دینے کی ہدایت شامل ہیں اس حوالے سے سی ڈی اے کے تمام متعلقہ شعبوں کے مابین بہتر رابطوں اور مانیٹرنگ کے موثر نظام کی بھی چیئرمین سی ڈی اے معروف افضل نے ہدایات جاری کر دی ہیں۔