کھاد پر سبسڈی کے دائرہ کار میں چھوٹے کاشتکار بھی شامل ہیں،ترجمان محکمہ زراعت

راولپنڈی۔ (اُردو پوائنٹ اخبارتازہ ترین - اے پی پی۔ 17 مارچ2017ء) ترجمان محکمہ زراعت پنجاب نے واضح کیا ہے کہ کھاد پر سبسڈی کے دائرہ کار میں تمام کسان بالخصوص چھوٹے کاشتکار شامل ہیں۔ یہ سکیم 8ایکڑ زمین کے مالکان تک محدود نہیں ہے ۔ترجمان نے اے پی پی کو بتایاکہ حکومت پنجاب ایک قومی شناختی کارڈ پر کھاد کے تین بیگ مہیا کر رہی ہے جس کا مقصد زیادہ سے زیادہ کاشتکاروں کو فائدہ پہنچانا ہے۔

(جاری ہے)

اس سبسڈی سے قبل بڑے زمیندار ہی پوٹاش کھاد استعمال کرتے تھے لیکن حکومت پنجاب نے چھوٹے زمینداروں کی فی ایکڑ بہتر پیداوارکے لئے اس سبسڈی سکیم کا اجراء کیا ہے۔ حکومت پنجاب اس سبسڈی کو موبائل کیش کے ذریعے مہیا کر رہی ہے جس کا مقصد کاشتکاروں کو بینکوں میں پیش آنے والی دشواری سے محفوظ رکھنا ہے اور سبسڈی کی رقم ان کی دہلیز تک پہنچانا ہے۔ کھاد پر سبسڈی سکیم کے تحت ایس اوپی اور ایم او پی کی قیمتیں بڑی حد تک کم ہو ئی ہیں اور یہ کھاد چھوٹے کاشتکارکے استعمال میں بھی آگئی ہے جس سے فی ایکڑ زرعی پیداوار میں اضافہ ہوگا۔ ترجمان نے مزید کہا ہے کہ حکومت پنجاب کاشتکاروں کی بہتری کے لئے سبسڈی کی سکیمیں جاری رکھے گی تاکہ زرعی خود کفالت کو یقینی بنایا جا سکے ۔