سفاری پارک میں شیرنی کاجل نے تین بچوں کو جنم دیدیا، تعداد 24ہو گئی

بدھ 18 اپریل 2018 17:31

لاہور (اُردو پوائنٹ اخبارتازہ ترین۔ 18 اپریل2018ء) سفاری پارک میں موجود افریقن نسل کی شیرنی کاجل نے تین بچوں کو جنم دیا ہے جس کے بعد پارک میں شیروں کی تعداد 24 ہوگئی ۔

(جاری ہے)

سفاری پارک لاہور کے ڈپٹی ڈائریکٹر شفقت چوہدری کے مطابق شیرنی کاجل نے 3 صحت مند بچوں کو جنم دیا ہے، سفاری پارک میں پہلے 21 شیر اور شیرنیاں تھیں،ننھے مہمانوں کی آمد کے بعد اب یہ تعداد 24 ہوگئی ہے۔شفقت چوہدری نے بتایا کہ سفاری پارک میں رائل بنگال ٹائیگرز کی تعداد 5 ہے ان میں سے ایک وائٹ ٹائیگر ہے جبکہ یہاں دو جیگوار بھی ہیں ، پارک میں شیروں اور ٹائیگرز کو بہترین خوراک دی جارہی ہے جس کی وجہ سے ان کی افزائش میں بہتری آئی ہے۔واضح رہے کہ لاہور کے رائیونڈ روڈ پر واقع سفاری پارک پنجاب کا سب سے بڑا سفاری پارک ہے۔