محمدعباس نے محمد آصف سے اہم اعزاز چھین لیا

محمد عباس نے گزشتہ8 سالوں میں پاکستانی فاسٹ بولروں کی جانب سے بہترین بولنگ کارکردگی کا اعزاز اپنے نام کیا

بدھ 16 مئی 2018 21:42

ڈبلن (اُردو پوائنٹ اخبارتازہ ترین - آئی این پی۔ 16 مئی2018ء) پاکستان کرکٹ ٹیم کے ابھرتے ہوئے فاسٹ بولر محمد عباس نے آئرلینڈکے خلاف ڈبلن ٹیسٹ میں منفرد اعزاز پالیا ہے ۔ انہوں نے گزشتہ آٹھ سالوں میں پاکستانی فاسٹ بولروں کی جانب سے بہترین بولنگ کارکردگی کا اعزاز اپنے نام کرلیا ہے۔

(جاری ہے)

محمدعباس نے آئرلینڈکے خلاف ڈبلن ٹیسٹ میں مجموعی طورپر 110رنز کے عوض 9وکٹیں حاصل کیں جو جنوری 2010 سے کسی بھی پاکستانی فاسٹ بولرکی جانب سے ایک میچ میں حاصل کردہ وکٹوں کی سب سے بڑی تعداد ہے۔

اس سے قبل یہ اعزاز محمد آصف کو حاصل تھا جس نے جنوری 2010 میں آسٹریلیاکے خلاف سڈنی کے مقام پر 94رنز دیکر آٹھ وکٹیں حاصل کی تھیں تاہم اب رواں دہائی میں بہترین بولنگ کا قومی اعزاز محمد عباس کے نام ہوگیاہے۔2010 سے محمد عباس کے علاوہ کوئی اور پاکستانی فاسٹ بولر ایک ٹیسٹ میچ میںآٹھ سے زائد وکٹیں نہیں لے سکاہے جبکہ میچ میں آٹھ وکٹوں کا کارنامہ صرف محمد آصف، اعزازچیمہ،عمرگل اور جنید خان کی جانب سے سامنے ایک ایک بار سامنے آیا ہے۔