وفاقی دارالحکومت میں فٹ بال کی ترقی کے کھلاڑیوں کو بھر پور محنت اور ڈسپلن کی پابندی کرنی ہوگی ، طارق چوہدری

کھلاڑیوں کو ہمیشہ اپنی جسمانی فٹنس پرتوجہ دینی اور متحد ہو کر جذبے کے ساتھ میدان میں اترنا چاہئے ،ْ میڈیا سے گفتگو

اتوار جون 13:10

اسلام آباد (اُردو پوائنٹ اخبارتازہ ترین۔ 10 جون2018ء) اسلام آباد فٹ بال ایسوسی ایشن کی مجلس عاملہ کے رکن اور جناح فٹ بال کلب کے صدر طارق محمود چوہدری نے کہا ہے کہ وفاقی دارالحکومت میں فٹ بال کی ترقی کے کھلاڑیوں کو بھر پور محنت اور ڈسپلن کی پابندی کرنی ہوگی اور اس سلسلہ میں عہدیداروں کوبھی نیک نیتی سے کام کرنا ہوگا، ان خیالات کا اظہار انہوں نے گذشتہ روز جناح فٹ بال کلب کے سینئر نائب صدر عابد حسین کی جانب سے ایک مقامی ہوٹل میں جناح فٹ بال کلب کے کھلاڑیوں کے اعزاز میں دیئے گئے افطار ڈنر کے موقع پر کیا، افطار ڈنر میں الفیصل فٹ بال کلب کے صدر محمد شدیر کے علاوہ جناح کلب کے کھلاڑیوں کی کثیر تعداد نے شرکت کی، انہوں نے کہا کہ کھلاڑیوں کو ہمیشہ اپنی جسمانی فٹنس پرتوجہ دینی چاہئے اور متحد ہو کر جذبے کے ساتھ میدان میں اترنا چاہئے، انہوں نے چیئرمین سی ڈی اے سے اپیل کی کہ وفاقی دارالحکومت میں نوجوانوں کو صحتمند سرگرمیاں فراہم کرنے کے لئے ہر سیکٹر میں کم ازکم ایک گرائونڈ بنایا جائے طارق چوہدری نے کہا کہ عید الفطر کے بعد جناج کلب کی تنظیم نو کی جائے گی جس میں نئے عہدیداروں کو بھی شامل کیا جائے گا، الفیصل فٹ بال کلب کے صدر محمد شدیر نے کہا کہ وفاقی دارالحکومت میں فٹ بال کے ٹیلنٹ کی کمی نہیں بلکہ کھیل کے میدان میں دنیا کا مقابلہ کرنے کیلئے ملک میں گراس روٹ سطح پر اکیڈمیز کا قیام بہت ضروری ہے اورصحت مند سرگرمیوں کیلئے کھیلوں کے میدان آباد کرنے کی اشد ضرورت ہے ۔

(جاری ہے)

انہوں نے کہا کہ فٹ بال کلبوں کے عہدیداروں کو متحد ہو کر فٹ بال کی ترقی کیلئے کام کرنا چاہئے، آخر پر کھلاڑیوں اور عہدیداروں نے جناح فٹ بال کلب سینئر نائب عابد حسین کا کھلاڑیوں کے اعزاز میں دیئے گئے افطار ڈنر پر شکریہ ادا کیا۔