آئی سی سی نے آفریدی پر پابندی عائد کردی

آئی سی سی نے یوگینڈا کے آل راونڈر عرفان آفریدی کا باولنگ ایکشن غیرقانونی قرار دیتے ہوئے ان پر انٹرنیشنل کرکٹ میں باولنگ کرانے پر پابندی عائد کر دی

منگل 13 نومبر 2018 21:51

دبئی (اُردو پوائنٹ اخبارتازہ ترین - آن لائن۔ 13 نومبر2018ء) انٹرنیشنل کرکٹ کونسل (آئی سی سی )نے یوگینڈا کے آل راونڈر عرفان آفریدی کا باولنگ ایکشن غیرقانونی قرار دیتے ہوئے ان پر انٹرنیشنل کرکٹ میں باولنگ کرانے پر پابندی عائد کر دی۔

(جاری ہے)

اومان میں جاری آئی سی سی ورلڈ کرکٹ لیگ ڈویژن تھری ٹورنامنٹ میں ڈنمارک کے خلاف ابتدائی میچ کے دوران عرفان آفریدی کے ایکشن کو رپورٹ کیا گیا تھا۔ آئی سی سی کی طرف سے جاری کردہ بیان کے مطابق ورلڈ کرکٹ لیگ ڈویژن تھری ٹورنامنٹ کے دوران وڈیو کے ذریعے ان کے باولنگ ایکشن کا جائزہ لیا گیا جس کے بعد ان کے ایکشن کو غیرقانونی قرار دیتے ہوئے فوری طور پر انہیں انٹرنیشنل کرکٹ میں باولنگ کرانے کیلئے معطل کر دیا گیا ہے۔