پاکستان ہاکی فیڈریشن کی اپیل ،نائب کپتان عماد بٹ پر پابندی ختم ، کل ہالینڈ کیخلاف کھیلیں گے

عماد بٹ پر ملائیشیا کے کھلاڑی کو زخمی کرنے کی کوشش پر پابندی لگائی گئی تھی، کپتان رضوان سینئر کی جگہ ارسلان قادر ایکشن میں نظر آئینگے

ہفتہ 8 دسمبر 2018 21:27

پاکستان ہاکی فیڈریشن کی اپیل ،نائب کپتان عماد بٹ پر پابندی ختم ، کل ..

بھونیشور (اُردو پوائنٹ اخبارتازہ ترین - آن لائن۔ 08 دسمبر2018ء) انٹرنیشنل ہاکی فیڈریشن نے پاکستانی ہاکی ٹیم انتظامیہ کی اپیل پر عماد کے خلاف ایک میچ کی پابندی کا فیصلہ واپس لے کر انہیں میچ میں شرکت کی اجازت دے دی ہے۔ورلڈ کپ میں پاکستانی ہاکی ٹیم نے آج اپنا اہم میچ ہالینڈ کے خلاف کھیلنا ہے، جس میں نائب کپتان عماد شکیل بٹ بھی شرکت کرسکیں گے۔

ورلڈ کپ ہاکی میں عماد بٹ پر ملائیشیا کے کھلاڑی کو زخمی کرنے کی کوشش پر پابندی لگائی گئی تھی۔

(جاری ہے)

دوسری جانب کپتان رضوان سینئر ان فٹ ہونے کی وجہ سے اس میچ میں حصہ نہیں لے سکیں گے، ان کی جگہ متبادل ٹیم میں شامل ہونے والے ارسلان قادر ایکشن میں نظر آئیں گے۔پاکستانی ٹیم کے لیے یہ میچ بہت اہمیت کا حامل ہے، کامیابی کی صورت میں قومی ٹیم اگلے مرحلے میں رسائی پانے کے امکانات بڑھ جائیں گے، بصورت دیگر کم سے کم مارجن سے ہار کے بعد ہی آگے جانے کا کوئی چانس ہوسکتا ہے۔

پہلے میچ میں پاکستانی ٹیم کو جرمنی نے ایک گول سے شکست دی تھی جبکہ دوسرے میچ میں ملائیشیا کے ساتھ میچ ایک ایک گول سے برابری پر ختم ہوا تھا۔ ٹیم انتظامیہ کے مطابق رضوان سینئر کے نہ ہونے سے نقصان ہوگا تاہم کوشش ہوگی کہ بہترین پرفارمنس دیں۔۔