سوہاوہ کا تحصیل ہسپتال سوہاوہ اہم شعبوں کے ڈاکٹروں سے محروم

ڈاکٹروں کی عدم دستیابی کی بناءپر مریضوں کو راولپنڈی ریفر کرنا معمول بن گیا

عمر جمشید جمعہ 3 مئی 2019 11:53

سوہاوہ (اُردو پوائنٹ اخبارتازہ ترین- 2 مئی 2019ء، نمائندہ خصوصی، احسن وحید) سوہاوہ کا اکلوتاسرکاری طبی مرکز تحصیل ہیڈ کوارٹر ہسپتال سوہاوہ ڈاکٹروں سے محروم ہے۔ جس کے باعث مریضوں کو علاج معالجے میں شدید مشکلات کا سامنا کرنا پڑتا ہے۔ تحصیل سوہاوہ کے اس اکلوتے ہسپتال میں ڈاکٹروں کی عدم دستیابی پر مریضوں کو راولپنڈی ریفر کرنا معمول بن گیا۔

تفصیلات کے مطابق تحصیل ہیڈ کوارٹر ہستپال سوہاوہ میں میڈیکل آفیسر کی سات سیٹیں خالی ہونے اور سکن سپیشلسٹ ، ای اینڈ ٹی، سرجن ، میڈیکل سپیشلسٹ ، چیسٹ سپیشلسٹ نہ ہونے کی وجہ سے مریضوں کو سخت پریشانی کا سامنا ہے جبکہ تحصیل ہیڈ کوارٹر ہستپال سوہاوہ میں آنے والے مریضوں کو سپیشلسٹ اور میڈیکل آفیسر نہ ہونے کی وجہ سے راولپنڈی ریفر کر دیا جاتا ہے اور ہسپتال میں ایک ہی ایمبولینس ہونے کی وجہ سے مریضوں کو پرائیویٹ ایمبولینس میں راولپنڈی جانا پڑتا ہے۔

(جاری ہے)

متعدد بار منتخب نمائندوں سمیت ڈپٹی کمشنر جہلم اور صوبائی وزیر تعلیم یاسمین راشد کو اپیل کرنے کے باوجود ہسپتال میں ڈاکٹرز کی تعیناتی کو یقینی نہ بنایا جا سکا۔ جبکہ دوسری طرف آپریشن تھیڑ کی سہولت ہونے کے باوجودسرجن ڈاکٹر شبیر اختر کا کنٹریکٹ ختم ہونے کے بعد تا حال کسی بھی سرجن کو تحصیل ہیڈکوارٹر ہسپتال تعینات نہ کیا جا سکا۔ شہریوں نے ایم پی اے راجہ یاور کمال ، ڈپٹی کمشنر جہلم سیف انور جپہ اور صوبائی وزیر صحت ڈاکٹر یاسمین راشد سے مطالبہ کیا ہے کہ لاکھوں کی آبادی کے لئے بنائے جانے والے واحد تحصیل ہیڈکوارٹر ہسپتال میں ڈاکٹرز کی تعیناتی کو جلد از جلد یقینی بنایا جائے تاکہ تبدیلی کا دعویٰ کرنے والی حکومت کا عوامی ریلیف عوام تک پہنچ سکے۔