عالمی چیمپئن جرمن فٹ بال ٹیم کے کوچ جوشم لو کی 2022ء ورلڈ کپ تک توسیع

جمعہ 19 جولائی 2019 10:20

برلن ۔ (اُردو پوائنٹ اخبارتازہ ترین - اے پی پی۔ 19 جولائی2019ء) سابق عالمی چیمپئن جرمن فٹ بال ٹیم کے کوچ جوشم لو کو معاہدے میں مزید دو برس کی توسیع مل گئی، نئے معاہدے کے تحت وہ 2022ء تک اپنی ذمہ داریاں جاری رکھیں گے جس میں قطر میں شیڈول ورلڈ کپ بھی شامل ہے۔ جوشم کی زیر کوچنگ جرمنی کی ٹیم نے 2014ء میں برازیل میں منعقدہ ورلڈکپ جیتنے کا اعزاز حاصل کیا تھا۔

(جاری ہے)

جرمنی نے فیصلہ کن معرکے میں ارجنٹائن کو زیر کر کے چوتھی مرتبہ عالمی ٹائٹل اپنے نام کیا تھا۔ جرمن فٹ بال ایسوسی ایشن کی طرف سے جاری کردہ بیان کے مطابق جوشم اور ایسوسی ایشن کے درمیان 2020ء میں شیڈول یورو فائنل تک معاہدہ تھا لیکن اب ہم نے ان کے معاہدے میں مزید دو برس کی تجدید کر دی ہے جس کے تحت جوشم اب 2022ء تک اپنے فرائض جاری رکھیں گے۔ 58 سالہ جوشم لو 2006ء سے جرمن ٹیم کی کوچنگ کر رہے ہیں، ان کی زیر کوچنگ جرمن ٹیم 160 میچز میں سے 106 میں کامیاب رہے اور انہیں کامیاب ترین جرمن کوچ ہونے کا اعزاز حاصل ہے۔