اسلام آباد ہائی کورٹ نے اسلام آباد پولیس آرڈر 2002 کے نفاذ کیلئے دائر درخواست پر سماعت 7جنوری تک ملتوی کر دی

جمعہ 11 اکتوبر 2019 20:26

اسلام آباد ۔ (اُردو پوائنٹ اخبارتازہ ترین - اے پی پی۔ 11 اکتوبر2019ء) اسلام آباد ہائی کورٹ نے اسلام آباد پولیس آرڈر 2002 کے نفاذ کیلئے دائر درخواست پر سماعت 7جنوری تک ملتوی کر دی۔ جمعہ کو اسلام آباد ہائی کورٹ کے چیف جسٹس اطہرمن اللہ نے کیس پر سماعت کی۔ اس موقع پر ایڈوکیٹ جنرل اسلام آباد طارق محمود جہانگیری عدالت کے سامنے پیش ہوئے۔ عدالت نے حکم دیا کہ پولیس آرڈر کی جو شقیں قابل عمل نہیں ان کے حوالے سے چارٹ کے ذریعے عدالت کو آگاہ کریں۔

(جاری ہے)

عدالت نے سوال اٹھایا کہ قانون کی کچھ شقیں قابل عمل نہ ہوں تو اس کی حیثیت کیا ہوگی ایڈوکیٹ جنرل نے عدالت کو بتایا کہ درخواست گزار کی جانب سے حقیقت عدالت کے سامنے نہیں رکھی گئی،پولیس آرڈر 2002 کے بعد لوکل گورنمنٹ آرڈیننس 2015 آ گیا ہے ۔ چیف جسٹس اطہر من اللہ نے کہا کہ پولیس آرڈر 2002 کسی اور آرڈیننس کے تحت نہیں آتا،یہ اسلام آباد پر ہی لاگو ہونا ہے جو لوکل گورنمنٹ کے ساتھ ہی لاگو ہونا تھا،لوکل گورنمنٹ کے نفاذ کے بعد نئے نوٹیفکیشن کی ضرورت نہیں۔ایڈوکیٹ جنرل اسلام آباد ہائی کورٹ طارق محمود نے کہا کہ اسلام آباد میں نہ ضلع ناظم نہ ڈسٹرکٹ پبلک سیفٹی کمیشن ہے ۔عدالت نے کیس کی مزید سماعت 7 جنوری تک ملتوی کر دی۔