پنجاب آئی ٹی بورڈ کے تحت جائزہ اجلاس’’ای پے پنجاب ‘‘کے ذریعے 1 ارب روپے سے زائد کا ٹیکس ریونیو وصول

ڈیبٹ ‘ کریڈٹ کارڈ‘ موبائل والٹس ادائیگی کے نئے چینلز کو شامل کرنے سے ریونیو میں مزید تیزی آئیگی،چیئرمین پی آئی ٹی بی

جمعرات 27 فروری 2020 15:50

لاہور ۔ (اُردو پوائنٹ اخبارتازہ ترین - اے پی پی۔ 27 فروری2020ء) ’’ای پے پنجاب‘‘ کے ذریعے 5 ماہ سے کم وقت میں 1 ارب روپے سے زائد ٹیکس ریونیو وصول کر لیا گیا۔ یہ بات پنجاب آئی ٹی بورڈ(پی آئی ٹی بی ) کے تحت جائزہ اجلاس میں بتائی گئی۔ اجلاس میں چیئرمین پی آئی ٹی بی اظفر منظور‘ڈائریکٹر جنرل فیصل یوسف و دیگر افسران شریک ہوئے۔ اجلاس کو بتایا گیا کہ’’ ای پے پنجاب ایپ‘‘ کے ذریعے شہریوں کو گھر بیٹھے آن لائن سہولت ملنے سے ٹیکسوں کی ادائیگی میں تیزی آ ئی ہے۔

(جاری ہے)

ای پے پنجاب منصوبہ‘پی آئی ٹی بی اور محکمہ خزانہ پنجاب کے اشتراک سے گزشتہ برس 4 اکتوبر کو شروع کیا گیاجسکے تحت پانچ سرکاری محکموں کے 13 ٹیکس ایک کلک پر ادا کئے جا سکتے ہیں۔ایپ سے ٹوکن ٹیکس‘ وہیکل رجسٹریشن‘پراپرٹی ٹیکس و دیگر کی فوری ادائیگی ممکن ہو گئی ہے۔ اجلاس کو بتایا گیا کہ عنقریب تعلیمی اداروں کی داخلہ فیس‘ لائسنس فیس‘ ای چالان وغیرہ بھی ایپ سے جمع کرائے جا سکیں گے۔ اس موقع پرچیئرمین پی آئی ٹی بی اظفر منظورکا کہنا تھا کہ ڈیبٹ ‘ کریڈٹ کارڈ‘ موبائل والٹس جیسے ادائیگی کے نئے چینلز کو شامل کرنے سے ریونیو کے حصول میں مزید تیزی آئے گی۔