اینٹی کرپشن ، ایل ڈی اے نے بلال یاسین کی موہنی روڈ پر قائم مارکی کو غیر قانونی قراردیتے ہوئے سیل کردیا

نواب میرج ہال و مارکی سائٹ میپ کی منظوری کے بغیر قائم کی گئی ،87لاکھ سے زائد سرکاری فیسیں بھی واجب الاداہیں

منگل 7 دسمبر 2021 16:25

لاہور(اُردو پوائنٹ اخبارتازہ ترین - این این آئی۔ 07 دسمبر2021ء) اینٹی کرپشن اور ایل ڈی اے نے مسلم لیگ(ن) کے رکن اسمبلی بلال یاسین کی موہنی روڈ پر قائم مارکی کو غیر قانونی قراردیتے ہوئے سیل کردیا۔اینٹی کرپشن اورایل ڈی اے کی ٹیم نے مشترکہ کارروائی میں موہنی روڈ پر بلال یاسین کی مارکی سربمہر کردیا۔ بلال یاسین اور محمد ندیم کی نواب مارکی اینڈ میرج ہال کے خلاف ڈی سی لاہور نے ریفرنس ڈی جی اینٹی کرپشن کو بھیجوایا تھا۔

(جاری ہے)

ریفرنس میں نشاندہی کی گئی تھی کہ بلال یاسین کا نواب میرج ہال و مارکی سائٹ میپ کی منظوری کے بغیر قائم کی گئی ہے۔نواب میرج ہال و مارکی موہنی روڈ پر2 کنال 5 مرلہ پر واقع ہے۔ اینٹی کرپشن کے مطابق بلال یاسین سرکاری فیسوں کی مد میں87 لاکھ 44 ہزار625 روپے کے نادہندہ ہیں۔ ڈی سی لاہورعمرشیرچٹھہ کے ریفرنس کے مطابق نواب میرج ہال بغیر منظوری کے قائم کرکے بلال یاسین نے کمرشلائزیشن فیس کی مد میں سرکاری خزانہ کو85 لاکھ سے زائد کا نقصان پہنچایا۔اینٹی کرپشن حکام کے مطابق نواب مارکی سائٹمیپ فیس کی مد میں دو لاکھ سے زائد کی نادہندہ ہے۔