پنجاب مقابلہ موسیقی حکومت کا مستحسن اقدام،پنجابی ثقافت، زبان اور موسیقی کے فروغ کی راہ ہموار ہو گی،صدر فیصل آباد چیمبر

فیصل آباد (اُردو پوائنٹ اخبارتازہ ترین - اے پی پی۔ 23 اپریل2024ء) فیصل آباد چیمبر آف کامرس اینڈانڈسٹریزکے صدر ڈاکٹر خرم طارق نے کہا کہ پہلا پنجاب مقابلہ موسیقی2024 صوبائی حکومت کا مستحسن اقدام ہے جس سے پنجابی ثقافت، زبان اور موسیقی کے فروغ کی راہ ہموار ہو گی ۔ وہ پہلے پنجاب مقابلہ موسیقی2024کی افتتاحی تقریب سے خطاب کررہے تھے جس میں سلوت سعید، پنجاب آرٹ کونسل کے ایگزیکٹو ڈائریکٹر سید بلال حیدر اور معروف گلوکار غلام علی نے خصوصی طور پر شرکت کی۔

انہوں نے کہا کہ فیصل آباد کے بعد یہ مقابلے صوبے کے دوسرے ڈویژنوں اور ضلعوں میں بھی منعقد کرائے جائیں گے تاکہ علاقائی ثقافت اور موسیقی کو بھائی چارے کے فروغ کےلئے مؤثر طور پر استعمال کیا جا سکے ۔ ان کا کہنا تھا کہ پنجاب نے بلھے شاہ، وارث شاہ اور میاں محمد بخش جیسے نامور پنجابی شاعر پیدا کئے ہیں جبکہ فیصل آباد کو نصرت فتح علی خاں جیسے عظیم گلو کار کا شہر ہونے کا بھی اعزاز حاصل ہے جس نے پوری دنیا میں قوالی کو نئے رنگ میں پیش کر کے اس شہر کی عزت میں اضافہ کیا۔

(جاری ہے)

انہوں نے کہا کہ آج جس آڈیٹوریم میں پہلا مقابلہ موسیقی منعقد ہو رہا ہے یہ بھی نصرت فتح علی خاں کے نام سے ہی منسوب ہے۔ ڈاکٹر خرم طارق نے پنجاب آرٹس کونسل میں سید بلال حیدر کی تعیناتی کوبھی سراہا اور کہا کہ انہوں نے پنجابی کلچر، زبان اور موسیقی کے فروغ کےلئے کلیدی اقدامات اٹھائے ہیں ۔ انہوں نے کہا کہ فیصل آباد لٹریری سوسائٹی یہاں دس دفعہ قومی سطح کی ادبی تقاریب منعقد کر چکی ہے تاہم بطور پنجابی ہماری ذمہ داری ہے کہ ہم ادبی خدمات سر انجام دینے والوں کا عوامی سطح پر اعتراف کریں۔

ان کا کہنا تھا کہ فیصل آباد کے لوگوں میں مزاح کی حسن بدرجہ اتم موجود ہے،ہمیں چاہیے کہ یہاں کی زبان اور کلچر کی از سر نو تشریح کریں اور بہتر ہوگا کہ ہم یہاں کے لوگوں کی برجستگی کے اعتراف میں اس کو شہر برجستگی کے نام سے منسوب کریں۔