سموگ کی روک تھام کے لیے کسانوں کو سپر سیڈر اور رائس اسٹراشریڈر 60 فی صد سبسڈی پر فراہم کئے جارہے ہیں،ڈپٹی کمشنر

گجرات (اُردو پوائنٹ اخبارتازہ ترین - اے پی پی۔ 17 مئی2024ء) ڈپٹی کمشنر گجرات صفدر حسین ورک نےکہا کہ حکومت پنجاب کسان بھائیوں کی فلاح و بہبود اور زرعی پیداوار میں اضافے کے لیے بہترین اقدامات کررہی ہے،سموگ کی روک تھام کے لیے کسانوں کو سپر سیڈر اور رائس اسٹراشریڈر 60 فی صد سبسڈی پر فراہم کئے جارہے ہیں، 60 فی صد رقم حکومت پنجاب جبکہ 40 فی صد رقم کسان برادشت کریں گے، مجموعی طور پر 139 کسانوں کو زرعی آلات فراہم کئے گئے، ان خیالات کا اظہار انہوں نے حکومت پنجاب کے انسداد اسموگ پروگرام کے تحت سبسڈی پر زرعی آلات کی فراہمی کی تقریب سے بطور مہمان خصوصی گفتگو کرتے ہوئے کیا۔

اس موقع پر ایڈیشنل ڈپٹی کمشنر ریونیو خضر حیات بھٹی، ڈائریکٹر زراعت توسیع ڈاکٹر عرفان اللہ وڑائچ، ڈپٹی ڈائریکٹر زراعت توسیع اطہر لطیف، ڈپٹی ڈائریکٹر ذرعی انجینئرنگ محمد زین سمیت کسانوں کی بڑی تعداد موجود تھی۔

(جاری ہے)

ڈپٹی کمشنر صفدر حسین ورک نے زرعی آلات کی قرعہ اندازی کی نگرانی کرتے ہوئے کہا کہ ضلع گجرات میں 123 سپر سیڈر اور 16 رائس اسٹراشریڈر سبسڈی پر فراہم کیئے جائیں گے،ضلع بھر سے 223 درخواستوں موصول ہوئیں جس میں شرائط و ضوابط کے بعد 139 درخواستیں قرعہ اندازی کے لیے اہل قرار پائی گئیں ، قرعہ اندازی میں کامیاب کسان بھائی زرعی آلات کی بکنگ کروائیں گے۔

ڈپٹی کمشنرنے کہا کہ گزشتہ سالوں سے سموگ کا مسئلہ شدت اختیار کرگیا گیا ہے جس سے بے پناہ مسائل جنم لے رہے ہیں، کسان بھائی فصلوں کی باقیات کو آگ لگانے سے گریز کریں، آگ لگانے سے زمین سے نامیاتی مادوں کی تلفی کے ساتھ ساتھ ماحولیاتی مسائل جنم لے رہے ہیں۔ انہوں نے کہا کہ حکومت پنجاب سموگ کی روک تھام کے لیے بہترین اقدامات کر رہی ہے ، اس سلسلے میں کسانوں کو زرعی آلات 60 فی صد سبسڈی پر فراہم کئے جارہے ہیں، کسان ان زرعی آلات سے استفادہ حاصل کریں اور سموگ کی روک تھام کے لیے اپنا کردار ادا کری۔ں